Në Maqedoni sot është heshtje zgjedhore, një ditë përpara referendumit të së dielës, ku mbi 1.8 milion qytetarë të Maqedonisë kanë të drejtën për të votuar në referendumin për emrin e ri të vendit të tyre.
Rreth 12 mijë vëzhgues vendor dhe 320 vëzhgues të huaj janë akredituar për ta ndjekur procesin e votimit. Gjatë fushatës partitë e pushtetit kanë mbajtur takime me qytetarë dhe janë angazhuar në një fushatë mediatike ku kanë shpalosur përparësitë e marrëveshjes me Greqinë për çështjen e emrit, për çfarë duhet të vendosin votuesit në referendum.
Edhe partitë shqiptare të cilat nuk janë pjesë e qeverisë, si Aleanca për Shqiptarët e Zijadin Selës, apo njëri krah i Lëvizjes “Besa”, kanë bërë fushatë duke u bërë thirrje shqiptarëve që të dalin në referndum dhe të votojnë pro për ndryshimin e emrit nga Maqedoni në Maqedoni të Veriut.
Megjithatë opozita shqiptare kërkon që pas referendumit kur të fillojë procesi i ndryshimeve kushtetuese, shqiptarët e Maqedonisë të figurojnë si element kushtetues në preambulë e jo siç është aktualisht: “pjesëtarë të një komuniteti që përbën të paktën 20 për qind të popullatës së vendit”.
Drejtues e zyrtarë të lartë perëndimorë vizituan javët e fundit Shkupin për të bindur kundërshtarët e referendumit se ndryshimi i emrit të Maqedonisë ishte kushti i vetëm për integrimin e vendit në NATO dhe BE.
Që referendumi të cilësohet i suksesshëm mbi 50% e votuesve duhet të votojnë pro pyetjes: “A jeni për anëtarësimin e vendit në NATO dhe BE duke pranuar marrëveshjen midis Republikës së Maqedonisë dhe Republikës së Greqisë?”.
Sot në Maqedoni të drejtën e votës e shfrytëzojnë personat e sëmurë, të burgosurit si dhe shtetasit që jetojnë jashtë vendit.
VAZHDO TË LEXOSH MË TEPËR PËR TEMËN
“Maqedonasit duhet ta pranojnë marrëveshjen e emrit”
‘Referendumi dhe identiteti shqiptar në Maqedoni’
