Ekrani gjerman “Mare TV”, i kushton këtë herë, një program të tërë bregdetit shqiptar.
“Bregdeti shqiptar, sekreti i bukur i Europës”, një dokumentar kushtuar bregdetit shqiptar, ka arritur kuota rekord të këtij programi në raport me shikueshmërinë, në 9.2 për qind të totalit të ndjekësve të ekraneve gjermane.
“Mare TV” është një institucion në formimin e opinionit turistik gjerman në televizionin NDR, televizioni publik gjerman për Veriun, i ndjekur kudo në Gjermani, Austri dhe Zvicër.
Në kushtet e pandemisë globale, ky program është një marketing i jashtëzakonshëm i Shqipërisë turistike, për efektet e pritshme pas zbutjes së masave dhe rifillimit të udhëtimeve.
Producenti lokal, gazetari Nolian Lole dhe kolegu gjerman Steffen Schneider e treguan Shqipërinë, pikërisht bregdetin jonian, nëpërmjet njerëzve që jetojnë dhe punojnë pranë detit.
“Një numër i konsiderueshëm turistësh vizitojnë vendet ku kamera e “Mare TV” shkon dhe i zbulon. Pamje të mahnitshme të brigjeve joniane, janë një ftesë e hapur për shikuesit për të ardhur në Shqipëri”, është shprehur, ministri i Turizmit.
Falë audiencës rekord të këtij dokumentari, trupa e “Mare TV” thotë se, po planifikon një seri të dytë, për dokumentimin e bregdetit shqiptar, këtë herë nga Laguna e Karavastasë deri në kufi me Malin e Zi.
VAZHDO TË LEXOSH MË TEPËR PËR TEMËN
Himara e bukur vlerësohet në Londër me çmim nderi
Artikulli për Sarandën, fama mbërrin në Australi
