Tirana ia ka dalë të firmosë me një nga portierët më me perspektivë si Visar Bekaj. Gardiani i përfaqësueses së Kosovës ishte pjesë e Prishtinës, por pasi bardheblutë kanë blerë kartonin e 23-vjeçarit, ai do të jetë pjesë e tyre për tre vitet e ardhshme.
Kështu, kryeqytetasit kanë zgjidhur një pikë shumë të rëndësishme të formacionit të Emanuel Egbo duke qenë se portieri aktual Ilion Lika është në fundin e karrierës.
Ky transferim i Bekajt pritej prej kohësh, teksa edhe vetë presidenti Refik Halili kishte udhëtuar drejt Prishtinës për ta parë dhe për të negociuar, por firma ka ardhur vetëm ditën e sotme.
Bekaj tashmë do të vihet nën urdhrat e trajnerit Emanuel Egbo për të ndihmuar skuadrën në paraqitjet në Europë, por edhe në kampionat. Ndërkaq, portieri është i rëndësishëm për Tiranën edhe në aspektin financiar, pasi aktualisht sipas “Transfermarkt”, kartoni i Bekaj kushton 250.000 euro.
VAZHDO TË LEXOSH MË TEPËR PËR TEMËN
Tirana vijon me përforcimet, vjen tjetër maqedonas
