Një kompani zvicerane ka vendosur të nisë misionin e parë të pastrimit të hapësirës në planet, pasi Agjencia Europiane e Hapësirës tha të enjten se po nënshkruanin një marrëveshje prej 86 milionë eurosh me përfaqësuesit e “startup” – it zviceran.
Kompania “ClearSpace”, shpreson të lëshojë një satelit të veçantë deri në vitin 2025, i cili do të jetë në gjendje të rrëmbejë pjesë të mbetjeve hapësinore në orbitën e Tokës. Aktualisht, mijëra satelitë të shkatërruar dhe shumë copa më të vogla mbetjesh po sillen rreth planetit, duke paraqitur një rrezik për përplasje gjithnjë e më të madh për satelitët që punojnë dhe madje edhe për Stacionin Ndërkombëtar të Hapësirës.
“Imagjinoni sa i rrezikshëm do të ishte lundrimi në det të hapur, nëse të gjitha anijet e humbura ndonjëherë në histori do të lëviznin akoma mbi ujë” tha Drejtori i Përgjithshëm i ESA-s, Jan Wörner, ndërsa njoftoi për herë të parë misionin në dhjetorin e kaluar.
Themeluesi dhe CEO i ClearSpace gjithashtu paralajmëroi se rreziku do të rritet vetëm për shkak të planeve për të dërguar “qindra apo edhe mijëra satelitë” në orbitën e ulët të Tokës në vitet e ardhshme.
