Kanë përfunduar ndeshjet e para të turit të 1/8 finale të Europa League. Në sfidat e orës 21:00 spikat fitorja 3-0 në shtëpi e Romës ndaj Shakhtar Donetsk. Një sukses që afron italianët për në turin tjetër.
Pellegrini në pjesën e parë dhe El Shaarawy e Mancini në të dytën siguruan një sukses të pastër, që vetëm mrekullia mund të përmbysë në kthim. Kumbulla u aktivizua për 90 minuta për verdhekuqtë.
Fitojnë edhe skuadrat angleze. Tottenham, që luante në shtëpi, mposhti 2-0 Dinamon e Zagrebit. Autor i golave ishte Harry Kane, nga një për secilën pjesë. Spurs shkojnë të qetë në ndeshjen e kthimit në Kroaci.
Fitore të rëndësishme mori edhe Arsenal, duke mposhtur 3-1 Olympiacos në Athinë. Odegaard shënoi një supergol në pjesën e parë, ndërsa në të dytën, pas barazimit të vendasve, golat e fitores u shënuan nga Gabriel dhe Elneny.
Vijon ecuria e mirë e Granadas, që edhe pse merr pjesë për herë të parë në këtë fazë, është një hap larg çerekfinaleve. Spanjollët fituan në shtëpi 2-0 ndaj norvegjezëve të Molde. Granada në turin e dytë eliminator u ndesh me Teutën e Durrësit.
