Një ngjarje e rëndë ka ndodhur sot rreth orës 14:30 në Rrugën e Kavajës në Tiranë.
Një 34-vjeçar i identifikuar si Rudolf Nikolli, është futur në ambientet e një xhamie në rrethana të paqarta dhe ka plagosur me thikë 5 persona.
Pas ngjarjes së rëndë policia ka arrestuar shtetasin nga Burreli, i cili po shoqërohet në ambientet e Drejtorisë Vendore të Policisë Tiranë, për veprime të mëtejshme.
Fatmirësisht të gjithë shtetasit e plagosur ndodhen jashtë rrezikut për jetën dhe janë transportuar në spital për ndihmë mjekësore.
Njoftimi i plotë
Rreth orës 14:30, në Rrugën e Kavajës, një shtetas është futur në ambientet e një kulti fetar (xhami) dhe në rrethana ende të paqarta ka plagosur me mjet prerës 5 shtetas.
Falë reagimit profesional dhe të menjëhershëm të shërbimeve të Policisë është bërë i mundur neutralizimi dhe prangosja e autorit të dyshuar, shtetasi Rudolf Nikolli 34 vjeç, nga Burreli, i cili po shoqërohet në ambientet e Drejtorisë Vendore të Policisë Tiranë, për veprime të mëtejshme.
Ndërkohë, shërbimet e Policisë iu kanë dhënë ndihmën e parë shtetasve të lënduar, të cilët janë transportuar në spital, për ndihmë mjekësore dhe ndodhen jashtë rrezikut për jetën
Në vendngjarje ka mbërritur grupi hetimor dhe nën drejtimin e Prokurorisë vijon puna për sqarimin e rrethanave dhe dokumentimin e plotë ligjor të ngjarjes.
VAZHDO TË LEXOSH MË TEPËR PËR TEMËN
