Shoqëria Zoologjike e Detroitit (DZS) po merr masa duke i zhvendosur zogjtë në kopshtin zoologjik të Detroitit brenda, për shkak të shqetësimeve për gripin e shpendëve, i cili është shumë ngjitës dhe vdekjeprurës, sipas kopshtit zoologjik.
Departamenti Amerikan i Bujqësisë (USDA) dhe Departamenti i Bujqësisë dhe Zhvillimit Rural në Michigan konfirmuan se virusi i gripit të shpendëve u identifikua në një tufë shpendësh në Kalamazoo County, në perëndim të Detroitit. Infeksione të ngjashme janë raportuar në të gjitha Shtetet e Bashkuara në javët e fundit.
“Kjo është një masë e rëndësishme parandaluese,” tha Dr. Ann Duncan, drejtore e shëndetit të kafshëve për DZS. “Duke i sjellë këto kafshë brenda, ne mund t’i monitorojmë më nga afër dhe të parandalojmë kontaktin me zogjtë e egër që mund të jenë bartës të virusit”.
Virusi mund të infektojë disa lloje zogjsh, sipas Organizatës Botërore për Shëndetin e Kafshëve (OiE). Rastet e reja të gripit të shpendëve janë shfaqur në më shumë se 40 vende gjatë gjashtë muajve të fundit, sipas OiE. Në javët e fundit, USDA ka identifikuar gripin e shpendëve në Delaware, Maine, Nju-Jork, Virxhinia dhe Kentaki.
Njerëzit në kontakt të ngushtë me zogjtë e infektuar mund të infektohen me virusin, por asnjë rast i gripit të shpendëve nuk është zbuluar te njerëzit në Shtetet e Bashkuara, sipas Shërbimit të Inspektimit të Shëndetit të Kafshëve dhe Bimëve USDA.
VAZHDO TË LEXOSH MË TEPËR PËR TEMËN
