Carlo Ancelotti po kalon një moment fantastik. Pasi fitoi titullin me Real Madrid, një rekord më vete, duke u bërë trajneri i parë që triumfon në 5 ligat kryesore evropiane, italiani shkoi mbrëmë për herë të pestë në finale të Champions, një tjetër rekord.
Historia dhe tradita e madhe zhvlerësuan miliardat e sheikëve të skuadrës angleze. Meritë e padiskutueshme e teknikut emilian, që ka trajnuar dhe ka fituar tituj kampion në Itali, Francë, Spanjë, Angli dhe Gjermani.
Ancelotti ka përvetësuar zakonet dhe traditat e gjysmës së Evropës, por dashuria për kuzhinën italiane nuk mund të mposhtet. Edhe nëse fiziku ndonjëherë nuk ia lejon t’i konsumojë.
Mister Evropa – Me triumfin e fundit të Real Madridit, Carlo Ancelotti u bë trajneri i parë në histori që fiton titullin në pesë ligat më të mira të Evropës: Itali, Francë, Spanjë, Angli dhe Gjermani. Një rekord i merituar për një trajner që ishte tashmë i vetmi me tre tituj në dy ekipe të ndryshme.
Pas fitores së La Liga-s me Real Madridin, zbulojmë pasionet e tij mes stërvitjes (ecjes dhe çiklizmit) dhe dietës. Ai është një adhurues i ushqimit të mirë, por detyrohet të kufizohet për “hatrin” e gjunjëve.
Gjyshi Carlo – Nipërit e tij kujdesen për ta mbajtur atë në formë para se të ushqehet dhe të bëjë palestër. Janë pesë nipër, tre nga Katia dhe dy nga Davide, që e duan shumë gjyshin e tyre.
Të vegjlit e Davide, tre vjeç e gjysmë, quhen Lucas dhe Leonardo, kanë lindur në Napoli (nëna Ana është spanjolle), ndërsa tre të Katia-s (babai është dietologu i Realit, Mino Fulco) janë Andrea, Alessandro dhe Aurora. Pas triumfit të Realit ata ishin në fushën e “Bernabeu” për të festuar me gjithë familjen.
Pasioni për gatimin dhe verën – Carlo Ancelotti është një adhurues i mishrave të pjekur, verës, picës dhe në veçanti kuzhinës emiliane. Ai e do ushqimin e mirë dhe receta e tij karbonara është bërë e famshme te Bayerni. I pëlqen të gatuajë dhe gjithashtu të zgjedhë verërat e duhura.
Për shembull, kur u intervistua për rubrikën “Në drekë me Financial Times”, Ancelotti zgjodhi një shishe “Guidalberto”, një nga verërat e tij të preferuara, e bërë nga “Cabernet Sauvignon” dhe “Merlot”.
Dieta e gjurit – Pavarësisht kësaj dashurie të madhe për ushqimin e mirë, Ancelotti nuk e tepron shumë. Dhe ka një arsye shumë specifike, siç ka thënë ai vetë: “Në tavolinë përmbahem, mësova ta bëj, ia imponova vetes në vitin e dytë në Londër, kur peshoja 101 kilogramë.
Duhet ta bëj për problemet e gjurit (të lindura që kur luante futboll), sepse duke mbajtur peshën nën kontroll mund t’i mbroj dhe të shmang protezat”. Ancelotti ka kryer gjashtë operacione në këmbët e tij.
Shëtitjet, deti dhe biçikleta – Gjithashtu dhe mbi të gjitha për këtë arsye ai nuk mund të bëjë kushedi se çfarë aktiviteti fizik: “Kur ngrihem ndjej sikur të gjithë gjunjët më plasariten”. Kjo është arsyeja pse ai ecën dhe mbi të gjitha nget biçikletën me një ritëm të mirë, por jo të tepruar.
VAZHDO TË LEXOSH MË TEPËR PËR TEMËN
Real nuk vdes kurrë, 17 herë në finale të Champions
