Pas thashethemeve që qarkulluan në javët e fundit, tashmë është zyrtare: FIFA ka prezantuar zbulimin gjysmë automatik të pozicionit jashtë loje në funksion të Kupës së Botës “Katar 2022”. Një revolucion i vërtetë për gjyqtarët e përfshirë në kampionatin e ardhshëm botëror.
Një vendim që, sipas shpjegimit, përdoret për të “ndihmuar gjyqtarët, në fushë dhe në VAR, për të marrë vendime më shpejt, më saktë dhe me besueshmëri”.
12 kamera të instaluara nën çatinë e stadiumeve do të mundësojnë “të kapin lëvizjet e topit edhe deri në 29 lëvizje të secilit lojtar, 50 herë në sekondë, për të llogaritur pozicionin e tyre të saktë në fushë. 29 grupet e të dhënave të mbledhura përfshijnë skajet dhe pjesët e trupit që merren në konsideratë për të sinjalizuar një offside”, – nënvizon FIFA.
Topi zyrtar i Botërorit (Al Rihla), do të përmbajë brenda tij një element vendimtar për zbulimin e pozicioneve të dyshimta. Ky është sensori i matjes inerciale (IMU, akronimi i tij në anglisht), i cili “i pozicionuar në qendër të topit, dërgon një paketë prej 500 të dhënash në sekondë në dhomën e videos, duke lejuar që të zbulohet momenti i saktë në të cilin goditet topi”.
“Ne jemi të vetëdijshëm se ndonjëherë kërkon shumë kohë për të kontrolluar një pozicion të mundshëm jashtë loje, – tha Collina, – veçanërisht kur ka shumë dyshime. Këtu teknologjia në fjalë është një ndihmë e madhe, pasi ndihmon për të marrë vendime më shpejt dhe me më shumë saktësi.
Testet ishin të suksesshme dhe ne jemi të sigurt se në Katar do të kemi një mjet shumë të vlefshëm që do t’i ndihmojë gjyqtarët dhe asistentët të marrin vendimet më të sakta në fushë. Unë e di që disa njerëz e quajnë atë një offside robotik, por ky nuk është rasti. Gjyqtarët dhe ndihmësit e gjyqtarëve mbeten përgjegjës për vendimet që marrin”.
Johannes Holzmüller, drejtor i inovacionit teknologjik në futboll, shpjegon: “Teknologjia gjysmë automatike për zbulimin jashtë loje do të konfigurohet me 12 kamera dhe topi zyrtar i garës do të ketë teknologji të lidhur në të gjitha stadiumet e Kupës së Botës.
Gjyqtarët e VAR do të vazhdojnë të monitorojnë rezultatet dhe do të duhet të vërtetojnë vendimin e propozuar përpara se të informojnë gjyqtarin kryesor.
Meqenëse të njëjtat të dhëna do të përdoren për të krijuar një animacion 3D, që do të jetë transmetuar për shikuesit në stadiume, tifozët do të kenë një pasqyrë të saktë të situatës së pozicionit jashtë loje në një kohë shumë të shkurtër”.
VAZHDO TË LEXOSH MË TEPËR PËR TEMËN
