Kryeministri Edi Rama thotë se rritja e fluksit të turizmit ka sjellë rëndimin e trafikut në disa akse kryesore të vendit, kryesisht në Thumanë-Kashar, Milot-Kashar.
Sipas tij për segmentet Milot – Thumanë, /Kashar – Lekaj / Lekaj – Fier kanë janë gati tre kontrata të reja, që po lidhen për të nisur menjëherë nga puna.
Për segmentin Milot – Balldren do të hapet gara e ndërtimit në vjeshtë, ndërsa Muriqan – Lezhë është segmenti lidhës me Malin e Zi, për të cilin po hartohet projekti paraprak dhe pritet të dorëzohet brenda dhjetorit 2023.
Kreu i qeverisë shkruan se korridori Blu do të jetë kolona vertebrore e infrastrukturës turistike.
Postimi i plotë i Edi Ramës:
NDJESË EDHE PAK DURIM JU LUTEM
I ndjekim me vëmendje ankesat e mirëkuptueshme të drejtuesve të automjeteve në aksin Shkodër – Tiranë këtë verë dhe jemi shumë të vetëdijshëm për faktin që rritja marramendëse e fluksit të vizitorëve në këtë sezon fantastik për industrinë e turizmit, e ka rënduar edhe më shumë se zakonisht situatën e trafikut përgjatë këtij aksi, sidomos në segmentin Milot – Kashar. Shpërblim i madh i përpjekjeve tona këmbëngulëse ky moment shpërthyes për turizmin, por shumë ndjesë për pasojën e këtij zhvillimi të shumëpritur, të cilën do ta vuajmë edhe për disa kohë në mungesë të Korridorit Blu
Lajmi i mirë është se puna e gjithanshme, me projektime dhe financime, për ta lidhur Shqipërinë Perëndimore nga veriu në jug me Korridorin Blu, një autostradë e mirëfilltë e standardeve europiane, ka hyrë më në fund në një fazë konkretizimesh po aq të shumëpritura sa edhe zhvillimi i mëtejshëm spektakolar i industrisë së turizmit
* Në segmentin THUMANË – KASHAR po vijon puna me ritme të shpejta dhe është realizuar mbi 40% e volumeve
* Për segmentet MILOT – THUMANË / KASHAR – LEKAJ / LEKAJ – FIER kanë përfunduar garat dhe janë tanimë gati tre kontrata të reja, që po lidhen për të nisur menjëherë nga puna
* Për segmentin MILOT – BALLDREN hapim garën e ndërtimit në vjeshtë
* MURIQAN – LEZHË është segmenti lidhës me Malin e Zi, për të cilin aktualisht konsulentët e Fondit të Investimeve për Ballkanin Perëndimor (ËBIF) po hartojnë projektin paraprak, të cilin pritet ta dorëzojnë në Dhjetor 2023
Korridori Blu do të jetë kolona vertebrore e infrastrukturës turistike të #Shqipërisë2030 e cila po merr formë ditë pas dite, si ylli në ngjitje i Ballkanit Perëndimor
Përdoruesit e aksit të rënduar Shkodër – Tiranë nuk do të durojnë më aq shumë sa kanë duruar, edhe pak durim dhe falë edhe Korridorit Blu po edhe shumë veprave publike në nivel vendor dhe investimeve shumë të konsiderueshme private në turizëm, Shqipërinë bregdetare turistike do ta kemi një nga krenaritë tona të mëdha kombëtare.
Foto e marrë nga: facebook.com/ediramaal/
VAZHDO TË LEXOSH MË TEPËR PËR TEMËN
Bypass-i i Fierit/ Rama: Mbyllen përfundimisht punimet
