Babai i Marigona Osmanit, Muhabi Osmani ka treguar se familja e tij ka marrë kërcënime përmes mesazheve nga profile në rrjete sociale me emër të Dardan Krivaçës nga burgu, i dënuar me burgim të përjetshëm për vrasjen e vajzës së tyre – Marigonës, në vitin 2021 në Ferizaj.
Osmani tregon se bashkëshortja e tij u kërcënua përmes mesazheve në telefon.
“Kërcënime ka pasur ndaj bashkëshortes, me anë të SMS-ve. Ka thënë që edhe këtë vajzën të madhën që e kemi edhe këtë [do t’ia bëj njësoj]. E kemi raportu në Polici, tash janë duke u marrë ata me këtë rast”- deklaroi Osmani .
Gjykata Themelore në Ferizaj ka dënuar Dardan Krivaqën me burgim të përjetshëm për vrasjen e 18-vjeçares, Marigona Osmani, ndërsa për bashkëpunëtorin Arbër Sejdiu u dha dënimi prej 15 vitesh burgim.
Dardan Krivaqa më 21 gusht 2021, rreth orës 10:14, në banesën e tij, pa pëlqimin e së ndjerës Marigona Osmani, e kishte detyruar atë të kryente marrëdhënie seksuale me të.
Një ditë më pas, më 22 gusht 2021, Krivaqa dhe Sejdiu akuzohen se e kanë vrarë Marigona Osmanin, në përpjekje për të fshehur dhunën.
Krivaqa dhe Sejdiu akuzohen për një serë veprash penale përfshirë atë të dhunimit, ndihmës në kryerjen e dhunimit si dhe vrasjes së rëndë në bashkëpunim.
Aktakuza thotë se Sejdiu kishte ndihmuar Krivaqën në kryerjen e veprës penale të dhunimit. Ai akuzohet se edhe pse ishte në dijeni se Krivaqa po kryente aktin e dhunimit, me dashje kishte marrë veprime në lehtësimin e kryerjes së kësaj vepre penale si dhe vazhdimisht kishte vëzhguar nëse ndonjë banor ishte duke lëvizur aty.
Që të dy akuzohen po ashtu se kanë tentuar të fshehin gjurmët e krimit, duke tentuar të fshehin pamjet e kamerave të sigurisë.
Krivaqa më parë shprehu keqardhje për atë që ka ndodhur. Paraprakisht Krivaqës, me kërkesë të avokatit mbrojtës, iu bë një ekzaminim psikiatrik, ku u konstatua se Krivaqa nuk ka ndonjë çrregullim apo sëmundje mendore të karakterit psikotik.
Kolektivi për Mendim dhe Veprim Feminist ka paralajmëruar një aktivitet para Gjykatës Themelore në Ferizaj.
Kolektivi për Mendim dhe Veprim Feminist tha po ashtu se nuk mund të harrohet “dhuna mizore”, që sipas organizatës, Krivaqa më ndihmën e Sejdiut, i shkaktuan Marigona Osmanit derisa ajo vdiq.
Avokatët mbrojtës të Krivaqës dhe Sejdiut, kishin kërkuar hedhjen poshtë të aktakuzës, por, gjyqtari i çështjes, Sahit Krasniqi, më 2 shtator të vitit 2022, refuzoi kërkesën dhe kundërshtimin e provave që u paraqitën nga ekipet mbrojtëse të të akuzuarve.
Sipas të dhënave, nga viti 2010 e deri më 2023, në Kosovë janë vrarë 50 gra. Organizatat për mbrojtjen e të drejtave të njeriut, në disa raste, kanë fajësuar autoritetet për dështim në mbrojtjen e grave të rrezikuara nga dhuna.
VAZHDO TË LEXOSH MË TEPËR PËR TEMËN
Autori kishte ushtruar dhunë edhe ndaj ish-të dashurës
Vrasja e 18-vjeçares, avokati: Prokuroria ka marrë kamerat
Familjarët e 18-vjeçares: Do veprojmë me kanun, nëse…
