“Truri” i sulmit në Banjskë, Milan Radoiçiç nuk mund të ekstradohet në Kosovë. Kështu ka thënë ministri i Punëve të Jashtme i Serbisë, Ivica Daçiç. “Të gjitha proceset gjyqësore do të zhvillohen para gjykatave vendase”, u shpreh ai, gjatë një interviste që dha për agjencinë Beta, më 13 dhjetor, teksa komentoi fletarrestimin e lëshuar për Radoiçiqin nga Organizata Ndërkombëtare e Policisë – INTERPOL. INTERPOL-i ka lëshuar ditë më parë një urdhër për arrestimin e Radoiçiçit, për shkak të sulmit të armatosur në Banjskë, në komunën e Zveçanit, në Kosovë. Lajmin për këtë fletarrestim e ka konfirmuar ministri i Qeverisë së Kosovës, Nenad Rashiq, duke thënë se ai është lëshuar me kërkesë të Ministrisë së Punëve të Brendshme të Kosovës, përmes Misionit të Organizatës së Kombeve të Bashkuara në Kosovë – UNMIK. Më 24 shtator, një grup i armatosur i serbëve sulmoi Policinë e Kosovës në Banjskë, në veri të Kosovës, dhe vrau rreshterin Afrim Bunjaku. Më pas, në shkëmbimin e zjarrit mbetën të vrarë tre sulmues serbë. Radoiçiç mori përgjegjësinë për sulmin në Banjskë, duke pohuar se ai “personalisht” e ka organizuar sulmin. Autoritetet kompetente të Serbisë e ndaluan Radoiçiçin, më 3 tetor, në Beograd me akuzën e “bashkimit me qëllim të kryerjes së veprave kriminale, prodhimit, posedimit, mbajtjes dhe trafikimit të armëve të zjarrit dhe lëndëve shpërthyese, dhe krime të rënda kundër sigurisë së përgjithshme”. Mirëpo, vetëm një ditë më vonë, ai u lirua. Presidenti i Serbisë, Aleksandar Vuçiç, në një intervistë për revistën javore serbe “NIN”, të botuar më 7 dhjetor, ka përsëritur se Milan Radoiçiç “do të përballet me procedura serioze në Serbi”.
VAZHDO TË LEXOSH MË TEPËR PËR TEMËN
Zbardhet takimi mes Albin Kurtit dhe presidentes Von der Leyen
Si i futi Radoiçiçi armët përmes Beogradit në territorin e Kosovës
