Opozita e Novi Sadit, e cila përbëhet nga të gjitha grupet e këshilltarëve opozitarë në kuvendin e qytetit, është e bashkuar në mbështetje të protestës civile që do të mbahet ditën e parë pas përfundimit të ditës së zisë, pra të martën, në 18:00 në Stacionin Hekurudhor në Novi Sad. “Ne kërkojmë arrestimin dhe ndëshkimin e menjëhershëm të të gjithë individëve, pakujdesia, papërgjegjësia dhe veprimet korruptive të të cilëve kanë rezultuar në humbjen e kaq shumë jetëve njerëzore, të cilat Novi Sadi nuk i kujtohet që nga bombardimi.” “Kërkojmë përgjegjësi politike, pra dorëheqjen e kryeministrit të Serbisë, Millosh Vuçeviç, ministrit të Ndërtimit, Transportit dhe Infrastrukturës, Goran Vesiç dhe kryetarit të Novi Sadit, Milan Gjuriç”, thuhet në njoftim.
Opozita e Novi Sadit kërkon gjithashtu që të vihet në dispozicion të publikut kontrata e plotë me investitorin kinez, si dhe dokumentacioni që lidhet me të gjitha projektet që u deklaruan si të rëndësisë kombëtare, por që i fshiheshin publikut. Shkaku i shembjes së strehës prej betoni nuk dihet ende. Zyra e Prokurorit në Novi Sad ka intervistuar të shtunën 26 persona lidhur me rastin, përfshirë edhe ministrin Vesiq. Ndërtesa e stacionit kryesor hekurudhor në Novi Sad është hapur në korrik të vitit 2024, pas tre vjetësh të rindërtimit.
Institucioni i hekurudhave serbe ka thënë në ditën e incidentit se streha e betonit që është shembur “nuk është rindërtuar dhe nuk ka qenë pjesë e renovimeve”. Megjithatë, ekspertët deklarojnë se edhe ajo pjesë ka qenë subjekt i rindërtimit.Punimet për rindërtim janë kryer nga një konsorcium kinez. Presidenti serb, Aleksandër Vuçiç, është zotuar të premten se do të ketë drejtësi dhe ka kërkuar ndëshkime të ashpra për përgjegjësit.
VAZHDO TË LEXOSH MË TEPËR PËR TEMËN
Pamjet/ Shembet streha në stacionin hekurudhor në Serbi
