Presidenti i Republikës së Shqipërisë, Ilir Meta, në vazhdën e nderimit të figurave sportive, sot ka pritur ekipin e famshëm të viteve 1970, “17 Nëntorin”, skuadra që bëri jehonë në arenën ndërkombëtare, duke u ndeshur me Ajax.
Kreu i shtetit shqiptar i ka dhënë çmimin skuadrës bardheblu “Kalorës i Urdhrit të Flamurit”. Në një ceremoni të thjeshtë, Meta ka bërë edhe fotot e rastit, ku spikat ajo me një nga legjendat Agustin Kola.
“Për rezultate të larta në futbollin shqiptar, duke paraqitur gjithmonë vlerat, shpirtin sportiv dhe konkurrencën e drejtë në këtë sport të bukur dhe popullor, si dhe për përfaqësimin dinjitoz në arenën ndërkombëtare, që kulmon në barazimin historik 2-2 në ndeshjen me ekipin e famshëm “Ajax” të Amsterdamit, pata sot kënaqësinë të nderoja me titullin e lartë “Kalorës i Urdhrit të Flamurit”, ekipin bardheblu të futbollit, “17 Nëntorin” e vitit 1970” – shkruan Prsidenti Ilir Meta në faqen zyrtare në Facebook.
Gjithashtu, po me këtë çmim, Presidenti ka nderuar edhe legjendën e Tiranës, Skënder Halili. Kompleksi sportiv ku stërvitet Tirana sot mban emrin e Skënder Halilit. Familjarë të legjendës kanë qenë të pranishëm.
