16.11.2018 - 23:05
Nuk ka shkëlqyer, por Brazili ka marrë një fitore minimale 1-0 në miqësoren ndaj Uruguajit, që ka vlerë vetëm për statistika, sfidë e zhvilluar në fushë asnjanëse, në “Emirates” të Londrës.
Ka qenë një sfidë e luftuar mes dy gjigantëve të futbollit amerikanojugor, me të dy skuadrat që kanë krijuar raste për të shënuar.
Gjithsesi, episodi që ka vendosur takimin ka ardhur në minutën e 75-të me penalltinë e shkaktuar nga Diego Laxalt pas një faulli të shkaktuar ndaj Danilo në zonën e rreptësisë.
Te pika e bardhë është paraqitur Neymar, i cili nuk ka gabuar dhe i ka shkaktuar Uruguajit humbjen e tretë radhazi në tri ndeshjet e fundit, që kanë qenë të gjitha miqësore.
