Zyrtarisht nuk ka ende një njoftim, por duke iu referuar të dhënave në faqen e Federatës Shqiptare të Futbollit, Kombëtarja shqiptare e futbollit të femrave ka trajnerin e ri dhe ai është Vioresin Sinani.
Armir Grima ishte pezulluar nga detyra që kur u arrestua me akuzën e trukimit të ndeshjeve. Pezullimi i Grimës duket se ka marrë fund duke qenë se trajneri është shkarkuar zyrtarisht nga detyra si trajner dhe vendin e tij e ka zënë Vioresin Sinani.
Sinani, ish-sulmuesi legjendar i Vllaznisë, Tiranës dhe i Kombëtares ka pasur më parë rolin e zv.trajnerit e ekipi i femrave dhe e njeh mjaft mirë këtë skuadër, prandaj edhe i është besuar ky rol. Sinani do të duhet të përgatisë ekipin kombëtar, për miqësoren që Shqipëria luan pas pak ditësh në transfertë përballë Sllovenisë.
Zv.trajnere e ekipit të femrave është emëruar Xhemile Berisha. Lëvizja në stolin e Kombëtares, është konfirmuar nga vetë FSHF, e cila në faqen zyrtare, njeh Sinanin si trajnerin e Kombëtares, ndërkohë që deri pak ditë më parë, aty ishte i shënuar emri i Armir Grimës.