Presidenti i Kosovës, Hashim Thaçi, në ditën e fundit të vizitës zyrtare në SHBA, ka mbajtur një ligjëratë publike në “Atlantic Council” në Uashington, në të cilën ka folur për angazhimet për të arritur një marrëveshje paqësore me Serbinë, për të vënë paqe të qëndrueshme në Ballkanin Perëndimor.
Presidenti Thaçi është shprehur se ndonëse Kosova ka qenë e gatshme dhe ka kërkuar marrëveshje për paqe gjithmonë, që nga Rambujeja e pastaj në Vjenë, megjithatë Serbia nuk ka pranuar të bëjë paqe me Kosovën.
Por tash, sipas Thaçit, falë presionit ndërkombëtar edhe Serbia është e gatshme për një marrëveshje paqësore, gjithëpërfshirëse e përfundimtare, me Kosovën.
Në anën tjetër, ai ka thënë se Kosova ka mësuar nga e kaluara se nuk ka marrëveshje pa kompromise, por gjithashtu ka mësuar se nëse bashkëpunon me partnerët e vet ndërkombëtarë, veçanërisht me Shtetet e Bashkuara, kompromisi ka sjellë deri te realizimi i aspiratave të popullit të Kosovës.
“Nëse pyesni pse tani po kërkojmë marrëveshje paqësore, ju them se tash është momenti kur edhe Serbia është e gatshme për një marrëveshje të tillë. Marrëveshja ende duket e largët, gati e pamundur”, u shpreh presidenti Thaçi dhe shtoi se “megjithatë jam optimist se mund të arrihet”.
Ndërsa, duke folur për përparësitë që do të sjellë marrëveshja, Thaçi ka thënë se janë tri pikë të rëndësishme në të cilat që do të sjellë dobi marrëveshja paqësore.
“Do të ketë njohje të Kosovës nga Serbia. Kosova do të anëtarësohet në Kombet e Bashkuara dhe do të forcojë perspektivën evropiane për të dyja vendet dhe tërë rajonin”, u shpreh presidenti Thaçi, duke shtuar se “BE na ka bërë të qartë në Samitin e Sofjes se nuk do ta pranojë Ballkanin Perëndimor, përderisa vendet e Ballkanit Perëndimor nuk i mbyllin çështjet e hapura që kanë mes tyre”. /Konica.al/
VAZHDO TË LEXOSH MË TEPËR PËR TEMËN
‘Ideja për korrigjim të kufijve është e Beogradit dhe Moskës’
“Deklaratat e Thaçit për korrigjim kufijsh, të vonuara”
‘Amerika s’ka ndryshuar qëndrim për Kosovën’
