Real Madrid ka kryer formalitetin edhe në ndeshjen e kthimit në Kupën e Mbretit, që pasi kishte 4-2 sfidën e parë, ka fituar edhe në transfertë 3-1 ndaj Gironas, duke kaluar në gjysmëfinale.
Ndeshja është zgjidhur që në pjesën e parë, teksa Benzema shënon dy herë, duke vrarë shpresat e vendasve për një surprizë të mundshme.
Sulmuesi francez shënoi golin e parë në minutën e 27-të, ndërsa në të 43-n thuajse mbyll takimin me golin e dytë ende pa mbaruar fraksioni i parë.
Porro në minutën e 71-të të pjesës së dytë ngushton shifrat në 1-2 dhe vendasit marrin zemër që të paktën mos humbin ndeshjen.
Por Real Madrid nuk pajtohet me këtë. Llorente në minutën e 76-të con shifrat në 1-3 dhe pjesa tjetër e ndeshjes pastaj duket më e thjeshtë për miqtë madrilenë.
Los Blancos mbrojnë fitoren dhe dalin kryelartë, duke pritur tashmë shortin e gjysmëfinaleve, teksa janë kualifikuar edhe Barcelona, Valencia dhe Betis.
