Sot në futbollin shqiptar është hapur një çështje që duket jo pak e komplikuar. Policia njoftoi se kundrejt administratorit të Kastriotit, Gazmend Vogli ka nisur një procedim penal për shkak të reklamës së një kompanie bastesh në fanellën e ekipit krutan.
Në lidhje me këtë procedim, ka reaguar vetë administratori Vogli, i cili në një prononcim për ‘VipSport.al’ është shprehur se në ligj nuk është e shkruar që ndalohet në klubet e futbollit.
Sa i përket Federatës, ai shprehet se nga institucioni më i lartë i futbollit vendor, nuk ka pasur asnjëherë paralajmërim dhe është lejuar të luajë me ato fanella në këto 5 ndeshje të para për vitin 2019.
“Neve s’na ka thënë kush që duhet hequr, e kemi lexuar edhe ligjin dhe nuk është i shkruar për ekipet e futbollit dhe pas kësaj që ndodhi do t’i ndryshojmë të gjitha, logo dhe fanellë.
Nga Federata nuk kemi marrë paralajmërim dhe as rregullorja e qeverisë nuk e ka. E ka për dyqanet dhe bizneset, por jo për ekipet e futbollit.
Përderisa nuk më tha njeri mua, nuk kisha pse të bëja investime kot dhe kjo ishte si rrufe në qiell të hapur. Dje nuk ishte ndeshja e parë pasi kemi pasur edhe ndeshje të tjera. Tani do të marrim masa dhe do të bëjmë ndryshime.
Dëme financiare? Sponsori na ka mundësuar vetëm bazën materiale dhe nuk do të kemi probleme në këtë aspekt. Tani na duhet bazë materiale e re dhe shkon deri në 14 mijë euro, por nuk kemi çfarë bëjmë. Duhet t’u përmbahemi ligjeve.
Unë jam punëtor dhe përderisa më lejojnë të zbres në fushë, nuk kam pse mbaj përgjegjësi. As ligji dhe as federata nuk na ka ndaluar asnjëherë, por mund të quhet edhe pak neglizhencë e jona, pasi ka kosto. Atë fanellë nuk e kam vetëm pas janarit, por e kam pasur që në fillim të sezonit”, – u shpreh Vogli.
