Si një hungarez që jeton në Berlin, i ndiqja nga larg protestat kundër Viktor Orbanit, derisa, shkova në shtëpi për Krishtlindje. Muajt e fundit kanë qenë shumë të veçantë për shumë njerëz në vendin tim. Mijëra vetë kanë demonstruar kundër qeverisë, partisë në pushtet Fidesz dhe udhëheqësit të saj. Mes turmave në Budapest, ndjeva rëndësinë e këtyre ngjarjeve edhe për mua.
Kjo ishte demonstrata e parë që kisha ndjekur që nga largimi i Hungarisë në vitin 2012. Që atëherë, partia e Orbanit ka fituar tri zgjedhje me radhë, jo domosdoshmërisht sepse Fidesz siguroi më shumë mbështetje në të gjithë vendin, por më tepër për shkak se opozita nuk ishte në gjendje të bashkohej dhe të ofronte një alternativë më të mirë.
Shumë hungarezë janë ende duke pritur për një lloj “shpëtimtari” nga jashtë, ndoshta politikanët e tjerë evropianë apo institucionet e BE. Por askush nuk ka ardhur për të na shpëtuar. As Angela Merkel, dikur një nga kundërshtarët kryesorë të politikës së refugjatëve të Orbanit në BE.
Nuk mund ta harroj konferencën e fundit të shtypit në Berlin në qershor 2018, kur ata u grindën para kamerave për të pasur fjalën e fundit mbi atë që do të thotë solidaritet për Evropën. Për Orbán, ka të bëjë me ndërtimin e gardheve. Për Merkelin, është të japësh azil.
Megjithatë, në dhjetëvjeçarin e kaluar, Merkel ka shmangur takimet me kryeministrin hungarez. Për katër vjet, ajo nuk e ftoi atë në Berlin. Ajo vendosi në fakt të tolerojë demoralizmin demokratik të Hungarisë.
Megjithëse mund të ndryshojnë, partitë udhëheqëse të Hungarisë dhe Gjermanisë janë në të njëjtin grup parlamentar në parlamentin evropian. Demokratët e krishterë gjermanë (CDU) kanë nevojë për mbështetjen e Fidesz. Ka simpati të dukshme mes të Fidesz dhe partisë bavareze të CDU, Bashkimi Kristian Social (CSU).
Hungaria, së bashku me shumë vende të tjera të Evropës Qendrore, po lufton me një mungesë serioze të punëtorëve për shkak të emigrimit masiv.
Por qeveria e Orbán miratoi një ligj të ri që lejon punëdhënësit të kërkojnë nga stafi që të punojë deri në 400 orë në vit në orët jashtë orarit. Njerëzit shpejt e quajtën atë “ligjin e skllevërve” dhe kjo është ajo që nxiti protestat e mëdha që filluan para Krishtlindjes në Hungari.
Verën e kaluar, disa anëtarë kishin kërkuar që Fidesz të dëbohej nga PPE nëse Orbán kishte kaluar “kufij të caktuar”. Në shtator, parlamenti europian nxiti procedurën e nenit 7 kundër Hungarisë për qeverisje demokratike dhe shkelje të të drejtave të njeriut, duke rritur mundësinë e sanksioneve. Por Fidesz mbeti në grupin e EPP.
Javën e kaluar parlamenti europian debatoi përsëri situatën e Hungarisë, kryesisht për shkak të protestave të fundit dhe ligjit mbi orët e punës jashtë orarit. Zyrtarët e qeverisë hungareze i hodhën poshtë akuzat. Jo vetëm që Orbán nuk u shfaq, por shumica dërrmuese e deputetëve nga grupi i EPP-së dhe madje edhe drejtuesi i saj Weber vendosën të mos marrin pjesë.
Ministri i jashtëm hungarez, Péter Szijjártó, e cilësoi debatin si një marifet përpara zgjedhjeve të BE në maj. E pra, ai kishte të drejtë: asgjë konkrete nuk pati pas kësaj.
Njerëzit kanë qenë në rrugë për javë të tëra, edhe me këtë të ftotë të acartë, me shpresën se do të kishte disa pasoja. Deri tani nuk ka pasur asnjë…
Dóra Diseri është gazetare hungareze në Berlin; ajo punon për N-OST, një rrjet raportimi në Evropën Lindore
VAZHDO TË LEXOSH MË TEPËR PËR TEMËN
BE “ndëshkon” rëndë Hungarinë
Dilema e madhe/ Makron apo Orban?!
