Ministrja e Financave dhe Ekonomisë, Anila Denaj, së bashku me kryetaren e Bashkisë së Durrësit, Valbona Sako, inspektuan disa prej bizneseve në zonën e plazhit në Durrës, të dëmtuara nga tërmeti.
Ministrja garantoi bizneset se të gjitha dëmet e shkaktuara do të përballohen nga buxheti i shtetit, i cili disponon fondet e nevojshme për të mundësuar këtë gjë.
Mjaft e rëndësishme në këtë situatë, theksoi Denaj, është vlerësimi i saktë i dëmeve nga ana e strukturave përgjegjëse shtetërore, në mënyrë që më pas të procedohet me fondet në dispozicion të përballimit të dëmeve.
“Buxheti i shtetit disponon fondet për ta mbështetur të gjithë pjesën e konstatimit të dëmeve, me rimbursim. Ky vlerësim dëmesh duhet të ndodhë këto javë dhe ne pastaj të kemi mundësi që menjëherë të hapim fondin, i cili është i plotë, por do të ketë edhe fonde shtesë. Unë jap garanci që i gjithë ky proces do të mbulohet 100 %”, u shpreh znj. Denaj.
Pavarësisht këtij fakti, Ministrja Denaj u bëri thirrje të gjithë bizneseve për tu solidarizuar me familjet dhe bizneset e prekura nga tërmeti.
“Nuk mungon edhe thirrja për bizneset për tu solidarizuar, për nevojën për mbështetje edhe në aspekt të fondeve monetare në numrat e llogarisë që janë hapur, pasi solidariteti në këto raste ndihmon të gjithë”, tha Ministrja.
Gjatë bashkëbisedimit me biznese të zonës, ministrja Denaj kërkoi mirëkuptimin e tyre për procedurat që do të ndiqen dhe theksoi nevojën për një mirëkoordinim mes strukturave shtetërore, në mënyrë që vlerësimi i dëmeve të bëhet sa më shpejt dhe më pas të vijohet me pjesën e fondeve për rimbursimin e tyre.
“Ne sigurojmë që fondi i emergjencës ekziston dhe në pamundësi për të qenë i plotë, ne siç e thashë më parë, kemi akoruar disa fonde shtesë për tu vendosur në ndihmë, nga fondi rezervë, për të kaluar te fondi i emergjencës. Në kontekstin e fondeve jemi të qetë. Ajo që ne duhet të koordinojmë është në raport me procedurat për rimbursim, sepse edhe nga ana proceduriale është e vështirë që ne të angazhohemi përpara se ekspertët të flasin për vlerën e dëmit për çdo familje”, u shpreh znj. Denaj.
VAZHDO TË LEXOSH MË TEPËR PËR TEMËN
Ahmetaj nuk largohet nga ekonomia, tregon detyrën e re të tij
“Pingpongu” i borxhit, Denaj: Është 67.2%
