Në ‘Programkino Ost’, në Dresden, në orën 20:00 të mbrëmjes së sotme, shfaqet premiera e filmit “Streha mes reve“. “Pas filmit, do të ketë një bisedë me publikun! Janë të mirëpritur të gjithë bashkatdhetarët tanë, që jetojnë në Dresden“, – është njoftimi i regjisorit Robert Budina, në vigjilje të shfaqjes së filmit të tij, në më shumë se 100 kinema në shtetin gjerman.
Lajmi është një kënaqësi, për sa i përket kinemasë shqiptare. Për të parën herë, një prodhim kinematografik shqiptar shpërndahet në kinematë gjermane.
Përtej kërshërisë së njohjes me një histori shqiptare, që i vendos ngjarjet në një fshat të veriut të Shqipërisë, filmit i jep tjetër vlerë edhe protagonist, Arben Bajraktari. Aktori I njohur në gjithë botën përmes filmave hollivudianë, si “Taken“, “Harry Potter“ këtë herë vjen në rolin e një bariu!
Ndërkohë, në “Facebook” shqiptarëve u bëht thirrje të ftojnë dhe miqtë gjermanë, për t’u njohur me filmin dhe kulturën tonë. “Ejani të shihni kulturën tonë, filmin tonë! Ne kemi një moto: një shqiptar, sjell dy gjermanë! Ejani ta shpërndajmë kulturën tone, sa më shumë“ – janë fjalët e regjisorit Budina.
VAZHDO TË LEXOSH MË TEPËR PËR TEMËN
‘Streha mes reve’, një film që kalon kufijtë
‘’Delegacioni’’, filmi që nis rrugëtimin ndërkombëtar
