Fotografinë artistike e dallon forma ose koncepti, pra një artist gjithmonë ka ngacmim estetik ose konceptual. Arti fotografik është tejet i rëndësishëm. Të jesh fotoreporter është natyrisht më e vështirë, sepse një fotoreporter ngarkohet t’i përcjellë ngjarjet përmes fotografive, rrjedhimisht të marrë pjesë edhe vetë në to.
Emri i Ridvan Slivovës është tashmë i njohur për publikun shqiptar. Fotoreporteri Slivova e ushtron këtë profesion për mëse 30 vjet. Pjesëmarrës në shumë ekspozita e bashkëpunëtor i shumë gazetave dhe revistave. Përgjatë kësaj periudhe me aparatin e tij, ai arriti të përjetësoi shumë ngjarje të rëndësishme, në të cilat qe prezent.
Specifikisht, në luftën e fundit në Kosovë gjatë viteve 98-99, ai arriti të nxjerrë disa fotografi të cilat sot i ekspozoi në hapësirat e Bibliotekës Kombëtare “Pjetër Bogdani” në Prishtinë. Këtë, Slivova vendosi ta bëjë pikërisht në përvjetorin e 12-të të Pavarësisë së Kosovës.
“Një popull që nuk e mban mend historinë e tij, është i dënuar t’i përsëritet historia” – ka thënë Suzana Çapriqi, kryesuese e Këshillit Drejtues të Bibliotekës Kombëtar, duke e konsideruar të rëndësishme ekspozitën.
“Angazhimi i artistit Ridvan Slivova për të kontribuar ishte i madh, dhe mendoj se është inkurajues edhe për artistët tjerë. Të gjithë e kemi për detyrë ta ruajmë të kaluarën dhe ta përcjellim te gjeneratat e ardhshme”, – ka theksuar ajo.
Para se ekspozita të jetë e qasshme për publikun, fjalën e mori vetë autori, Slivova, i cili tha se është shumë i lumtur për interesimin dhe mundësinë e ofruar për ta jetësuar këtë ekspozitë.
“Ndihem mirë që m’u dha mundësia ta shfaq punën time”, – tha ai, fillimisht.
“Në ato vite, isha edhe vetë mes popullatës dhe për mua ishte e vështirë. Këtu shihet largimi i popullatës nga fshati, më vonë edhe gëzimi me ardhjen e KFOR-it dhe kthimi i tyre do të thosha në gërmadha, në shtëpitë e shkatërruara”, – u shpreh Slivova, duke përfunduar.
“E fundit që do të dëshiroja të jetë histori e përfunduar është ajo për të pagjeturit”, – tha ai.
Ekspozita vijon në hollin e Bibliotekës Kombëtare, duke ngjallur menjëherë shumë interes.
Për më shumë lajme, vizitoni: www.konica.al
VAZHDO TË LEXOSH MË TEPËR PËR TEMËN
“Lutja” e Gazmend Lekës
“Ndryshe”, Ekspozita e komunitetit rom dhe nudos
‘’Ditët e Mios’’ vijnë plot impresionizëm në Korçë
