Presidenti i Republikës, Ilir Meta, jep një mesazh ngushëllimi për ndarjen nga jeta të ikonës së muzikës shqipe, Nexhmije Pagarusha. Meta shkruan në “Facebook” se ky është një lajm tragjik, ndërsa e cilëson pagarushën një artiste të madhe dhe të papërsëritshme.
Sipas tij, Pagarusha ishte një artiste që bëri histori në momente të vështira, falë talentit të saj, personalitetit fisnik e të spikatur, ndaj dhe do të mbetet përherë një model referimi për brezat e rinj të artistëve, një yll i pashuar i muzikës shqiptare.
“Unë isha fatlum ta njihja nga afër dhe të ndaja me të shumë momente të bukura dhe të paharrueshme. Ajo nuk ishte magjike, vetëm në skenë dhe ekran, por në çdo moment të jetës së saj”, shkruan Meta.
Mesazhi i Metës:
Me shumë dhimbje e hidhërim të thellë mora lajmin tragjik të ndarjes nga jeta të Mbretëreshës së këngës shqiptare, artistes sonë të madhe e të papërsëritshme, Nexhmije Pagarusha. E dashur dhe e admiruar nga të gjitha brezat për vokalin e jashtëzakonshëm, emocionet dhe krenarinë që i dhuroi kombit në dekada, kjo humbje e pazëvendësueshme i ka prekur sot të gjithë shqiptarët dhe admiruesit e saj kudo.
Si artiste që bëri histori në momente të vështira, falë talentit artistik, personalitetit fisnik e të spikatur, Nexhmije Pagarusha, do jetë përherë një model referimi për brezat e rinj të artistëve, një yll i pashuar i muzikës shqiptare, këngët e së cilës do të këndohen përjetë.
Unë isha fatlum ta njihja nga afër dhe të ndaja me të shumë momente të bukura dhe të paharrueshme. Ajo nuk ishte magjike, vetëm në skenë dhe ekran, por në çdo moment të jetës së saj.
Duke ndarë dhimbjen e thellë për këtë humbje të madhe, u shpreh ngushëllimet më të sinqerta familjes, të afërmve, bashkëpunëtorëve dhe të gjithë artdashësve shqiptarë. Si një nga përfaqësueset më të mëdhaja të artit e muzikës, e nderuar dhe vlerësuar ndërkombëtarisht, me trashëgiminë e vyer që la pas, Nexhmije Pagarusha do të mbetet e paharruar për të gjithë ne.
VAZHDO TË LEXOSH MË TEPËR PËR TEMËN
Baresha iku… mes jehonës së Bjeshkëve të Nemuna
Epopeja që mban emrin Pagarusha
Çfarë ka thënë Dritëroi dhe Pagarusha për Vaçe Zelën?
