Gjermania kërkon në BE gjithnjë e më shumë masa të ashpra kundër hakerave rusë për shkak të sulmit virtual ndaj Bundestagut. Berlini fajëson shërbimin ushtarak rus dhe flet për „zhvillim të luftës hibride“.
Angela Merkel është e njohur për mënyrën e saj të ftohtë dhe pragmatike. Më 13 maj kancelarja gjermane në mënyrë të pazakontë u shfaq emocionale në pultin e fjalimit para Bundestagut. Një politikane e opozitës e pyeti, se çfarë të dhënash ka për sulmin e hakerave ndaj Bundestagut në vitin 2015, ku u vodhën të dhëna nga zyra e Merkelit si deputete. Kancelarja foli për „evidenca të forta” që qendra ruse ndodhen pas vjedhjes të të paktën 16 gigabyte dokumente dhe E-Mail-e nga rrjeti i Bundestagut, mes tyre mijëra maile të zyrave të deputetëve. Ajo e lidhi këtë sulm kibernetik me një „strategji të zhvillimit hibrid të luftës, që përmban zhvillim të luftës për desorientim kibernetik dhe shtrembërim të fakteve”. „Ta them shumë hapur: Më dhemb kjo”, sepse përpiqem për një marrëdhënie më të mirë me Rusinë”, tha Merkel.
Fajësimi publik
Ky pozicionim i kancelares shënon një kthesë në pozicionimin publik ndaj sulmeve kibernetike ruse. Një pikë kthese, që u iniciua ditë më parë nga Prokuroria e Përgjithshme. Peter Frank kishte lëshuar një urdhër arresti ndërkombëtar kundër Dmitrij Badin. Hetuesit janë të bindur. 29-vjeçari rus qëndron pas sulmit spektakolar të sistemev IT të Bundestagut në pranverën e vitit 2015. Softwar-i dëmtues kishte depërtuar kaq thellë në rrjet, saqë ai duhej të stakohej i gjithi dhe të ringrihej nga e para.
Masa politike e pasuan këtë urdhërarresti. Në fund të majit u thirr në Ministrinë e Jashtme në Berlin, ambasadori rus, Sergej J. Netshajev. Atij iu bë e ditur se Berlini “do të angazhohet në Bruksel për përdorimin e regjimit të sanksioneve kibernetike të BE kundër përgjegjësve për sulmin ndaj Bundestagut, mes tyre edhe Herr Badin.”
Ky mekanizëm sanksionesh në raste sulmesh kibernetike u miratua nga Këshilli i Europës më 17 maj 2019. Në rast sulmesh kibernetike që kanë “pasoja të rënda”, BE mund të vendosë sanksione kundër personave dhe institucioneve që janë përgjegjës. Sanksionet parashikojnë ndalimin e udhëtimit në BE ose ngrirje të pasurive.
Julia Schütze, menaxhere e projektit për Politikën e Sigurisë Kibernetike në institutin e Berlrinit, „Fondacioni për Përgjegjësi të Re”, e quan këtë masë para së gjithash një “simbolikë politike strategjike.” Nga korriku Gjermania mban presidencën e radhës në BE. Ministria e Jashtme i konfirmon Deutsche Welles, se qeveria gjermane ka përgatitur “propozime për një listë sanksionesh në lidhje me sulmin e hakerave dhe është në shkëmbim me partnerët e BE për procedurat e parashikuara.”
Adresë banimi në shërbimin sekret
Edhe FBI ngre akuza të rënda kundër hakerit Dmitrij Badin, lindur në Kursk, 500 km larg Moskës. Ai me gjasë ndodhet në listën e personave që në vitin 2016 vodhën E-Mail-et e kandidates Hillary Clinton dhe Partisë Demokratike dhe në fund i publikuan ato, për të manipuluar zgjedhjet në favor të Donald Trumpit.
Edhe platforma hulumtuese Bellingcat e lidh Badin me shërbimin ushtarak rus, GRU. Hulumtuesit kanë gjetur se adresa zyrtare e tij është identike me adresen e njësisë GRU, 26165. Kjo njësi njihet si një „kërcënim i vazhdueshëm i zhvilluar”, (APT -Advanced Persistent Threat). Ky grupim akuzohet edhe për sulme të tjera, edhe ndaj agjencisë së antidopingut, WADA, OSBE apo NATO-s.
Megjithatë sigurimi i provave për sulmet kibernetike është i vështirë. Në hapësirën virtuale gjurmët fshihen ose vendosen qëllimisht shtigje dezorientuese. Ka momente dyshimi dhe të dhëna teknike që u mjaftojnë shërbimeve sekrete, kurse gjykatat duan prova të qarta. Për hetuesit gjermanë pati rëndësi ndihma nga Holanda. Kundërspiunazhi i këtij vendi në vitin 2018 zbuloi një sulm ndaj Organizatës për Ndalimin e Armëve Kimike, OPCW. Holandezët patën në dorë kështu një numër të dhënash që vlenin për Prokurorinë e Përgjithshme gjermane, thotë Julia Schütze. Të dhëna të qarta që të çonin tek rusi Badin. Gjermania nuk do ta lerë pa shfrytëzuar presidencën e radhës nga 1 korriku, në mënyrë që sulmi ndaj Bundestagut të mos mbetet pa pasoja.
Matthias von Hein, Deutsche Welle
VAZHDO TË LEXOSH MË TEPËR PËR TEMËN
‘Xhelozia’ ndaj Rusisë, SHBA dënon rëndë Indinë
“Duhet të përgatitemi për një botë me më shumë raketa ruse”
“Gjysma e rusëve në Londër janë spiunë të Kremlinit”
