Ndeshje çdo 3 ditë dhe kryesfida në fundjavë. Është ky plani i përpiluar nga Liga e Futbollit italian që tashmë është gati të ndez emocionet e Seria A. Me riformatimin e kalendarit, supersfidat që pritet të përcaktojnë shumë për objektivat sezonal do të luhen kryesisht të dielën.
Juventus, Lazio dhe Inter i pret një kalendar mjaft drithërues, ndërkohë që në ndihmë i ka ardhur Liga, e cila nuk ka lejuar që një skuadër të zbres në fushë më shumë se 2 herë në harkun kohor të një jave, duke i ardhur në ndihmë futbollistëve që pas thuajse 3 muajsh janë gati për tu rikthyer në fushë.
20 qershori është caktuar si data e rikthimit të Seria A, por futbolli në Itali do të ndez projektorët me sfidat e Kupës së Italisë, ku kanë mbetur për tu përcaktuar gjysmëfinalistët dhe kampioni i sezonit 2019-2020. Sfidat që do të përcaktojnë shumë për garat Europiane, Napoli-Milan, Roma-Inter dhe Juventus-Lazio do të luhen në orarin më të shpeshtë, atë të 21:45.
Paralelisht me planet e këtij sezoni, Liga e Futbollit italian po punon për edicionin e ardhshëm. Rikthimi i tifozëve në shkallët e stadiumit shihet si objektivi më konkret, por gjithmonë me kufizime të tyre në tribuna. Sipas mediave nga përtej adriatikut po mendohet që duke nisur nga mesi i korrikut të nis pranimi i 10% të tifozëve në shkallët e stadiumit për ta rritur në 25% gjatë muajit shtator.
VAZHDO TË LEXOSH MË TEPËR PËR TEMËN
Kupa më 12 qershor në Itali, rinis me një supersfidë
