Prej shumë vitesh e për shumë breza, ai është “baca i shqiptarëve”. Ikona e skenës dhe ekranit, Reshat Arbana, feston sot 80-vjetorin!
Si një nga aktorët me popullorë të kinemasë shqiptare, me 45 role në kinematografi dhe me dhjetëra të tjerë në teatër, Arbana me rolet e tij kanë pasuruar kulturën kombëtare. Ai lindi më 15 shtator 1940 në Tiranë. Ndërsa roli i parë i tij, shënohet në vitin 1963.
Në maj 2004, Reshat Arbana, i cili për shumë shqiptarë shihet si model frymëzimi, u rikthye në skenën e Teatrit Kombëtar, me rolin e protagonistit në dramën “Streha e të harruarve”.
Më 7 tetor 2011, President i Republikës, i akordoi Urdhrin “Nderi i Kombit” me motivacionin: “Aktorit të shquar të teatrit dhe kinematografisë, i cili me interpretimin mjeshtëror dhe origjinalitetin e tij u bë një artist popullor e shumë i dashur për publikun, rolet e të cilit kanë pasuruar me vlera të reja kulturën kombëtare.”
Reshat Arbana gëzon respektin dhe dashurinë e mbarë shqiptarëve për personalitetin e jashtëzakonshëm, cilësinë artistike dhe pasionin me të cilin ka interpretuar role dhe ngjarje, duke i pasuruar me humanizmin që përcjell dhe kulturën e veshur.
Konica.al ka një përshëndetje speciale për artistin – ju risjellim bashkëpunimin e dy artistëve: Arbana, përshëndeti dhe iu dha zemër mbarë shqiptarëve, me vargjet e dhimbjes për tokën mëmë, që Çun Lajçi i shkroi pas tërmetit shkatërrimtar të 26 nëntorit… Jetë të gjatë, Mjeshtër!!!
“Shqipnisë sime t’luhatun”
Kur dridhesh ti
Ne s’bajmë gjumë Shqipni
Se tutemi po vdes
E rrajë jetimash mbesim
Të duem edhe kur vërshohesh
Ujnash
Edhe kur digjesh
Zjarresh
Edhe kur mallkohesh nesh
Kur luhatesh
Dridhesh e përkundesh
Tërmetesh
Si zogj t’futemi n’gji
E lutemi
Vetëm ti t’mos vdes
Ne
S’bajmë gjumë kur ti dridhesh
Se veç Ty t’kemi Shqipni”.
VAZHDO TË LEXOSH MË TEPËR PËR TEMËN
Reshat Arbana dhe Sami Ameni
“Babai” ngjitet në skenën e A.Z Çajupit
