Presidenti Trump pretendon: “Këto zgjedhje janë një zgjedhje e thjeshtë: Nëse Biden Fiton, Kina Fiton.”
Por në krizën më të rëndësishme me të cilën përballet bota tani, koronavirusin, Kina po fiton dhe Amerika po humbet.
Kjo sepse Kina po ndjek shkencën dhe Trump po e lufton atë.
Shtetet e Bashkuara (pop. 328 milion) kanë më shumë se 8.1 milion raste të konfirmuara të koronavirusit dhe më shumë se 219,000 vdekje. Kina (pop. 1.4 miliardë) ka pasur më pak se 91,000 raste të konfirmuara dhe 4,700 vdekje të konfirmuara.
Të dielën, Shtetet e Bashkuara kishin 47,637 raste të reja, krahasuar me 13 në Kinë. Shkalla e vdekjes në SHBA është rreth 670 për 1 milion njerëz. Në Kinë, janë rreth tre vdekje për 1 milion njerëz. Numrat e Kinës ndoshta nuk janë plotësisht të saktë, por gjithsesi, numri i viktimave amerikane ka të ngjarë të jetë shumë më i lartë se sa tregojnë shifrat zyrtare.
Kina meriton ndëhkim që nuk tregoi për koronavirusin e ri kur filloi në Wuhan, por që nga ajo kohë ajo ka zhvilluar një betejë të suksesshme duke përdorur mjete të tilla si bllokime, distancime shoqërore, gjurmim kontakti, mbajtje maske dhe izolim të pacientëve.
Disa nga gjërat që Kina ka bërë do të konsiderohen shumë të rënda për Shtetet e Bashkuara.
Por suksesi i Kinës është kryesisht për shkak të zbatimit të shkencës në një vend ku njerëzit mësohen të respektojnë shkencën. Ne jetojmë në një vend, përkundrazi, ku presidenti tallet me kundërshtarin e tij duke sharë: “Ai do të dëgjojë shkencëtarët”. Kjo supozohet të jetë një gjë e keqe?
Trump sigurisht që nuk po i dëgjon shkencëtarët. Këshilltari më i rëndësishëm i shëndetit publik në Shtëpinë e Bardhë është Scott Atlas, një neuroradiolog pa asnjë përvojë në sëmundje infektive ose epidemiologji.
Atlas mbron idenë e lejimit të koronavirusit të përhapet praktikisht i pakontrolluar në shumicën e popullsisë për të prodhuar “imunitet të tufës”.
Tom Frieden, ish-kreu i Qendrave për Kontrollin dhe Parandalimin e Sëmundjeve, paralajmëron se kjo strategji do të vriste të paktën 500,000 më shumë Amerikanë.
Atlas gjithashtu pretendon se maskat nuk funksionojnë edhe pse komuniteti mjekësor ka arritur në përfundimin se ato janë një nga mjetet tona më të mira për të luftuar infeksionin. Pretendimi i Atlas për maskat u hoq nga Twitter të dielën sepse është kaq i rrezikshëm.
Atlas madje kundërshton testimin në masë të madhe, i cili është thelbësor për rihapjen e ekonomisë në mënyrë të sigurt.
The Post raporton se administrata refuzon të shpenzojë 9 miliardë dollarë që Kongresi i ndau për të rritur testimin.
Me pak fjalë, këshilltari kryesor i shëndetit publik në Shtëpinë e Bardhë është një kërcënim për shëndetin publik. Në të kundërt, Anthony S. Fauci, i cili u nderua të hënën me një citim për “udhëheqje shembullore” nga Akademia Kombëtare e Mjekësisë, është quajtur nga Trump, “katastrofë”.
Përbuzja e Trump për shkencën, për fat të keq, imitohet nga mini-Trumps që qeverisin shtetet e kuqe, ku virusi tani përhapet i shfrenuar.
Trump vazhdon me papërgjegjshmëri të organizojë tubime për fushatën e rizgjedhjes ku pak njerëz mbajnë maska ose zbatojnë distancimin shoqëror.
Presidenti është, siç zbuluan studiuesit në Universitetin Cornell, “nxitësi i vetëm më i madh i keqinformimit rreth Covid”.
Nuk është çudi që një sondazh i Pew Research Center tregoi se njerëzit në 13 vende i japin Kinës nota më të larta se Shtetet e Bashkuara për të luftuar pandeminë.
Veprimet negative të Kinës vazhdojnë akoma, si për shembull krimet kundër ujgurëve.
Por kriza covid-19 zbulon se Kina, me gjithë mëkatet e saj, ka udhëheqës të arsyeshëm ndërsa Amerika, jo.
Nëse virusi do të ishte një armik njerëzor, Trump do të kishte valëvitur shumë kohë më parë flamurin e bardhë, ndërsa Kina do të pranonte dorëzimin e saj të pakushtëzuar.
Max Boot, kolumnist i The Washington Post
Përkthyer dhe përshtatur nga The Washington Post/ konica.al
VAZHDO TË LEXOSH MË TEPËR PËR TEMËN
Luftë e ftohtë SHBA-Rusi, sanksionohet ‘kuzhinieri i Putin”
“Koronavirus do të ndihmojë ekonominë e SHBA”
“Media përhap panik për të dëmtuar Trumpin”
