Pas humbjes me Kukësin, Armando Cungu u largua nga drejtimi i Laçit. Klubi kurbinas ka zgjedhur trajnerin e ri, që do të jetë Shpëtim Duro, i cili kthehet përsëri në pankinën e një klubi në Kategorinë Superiore.
Tekniku, i cili kishte mbetur pa ekip që nga marsi kur u shkarkua nga ekipi i Kukësit, tashmë do të jetë në stolin e Laçit, për të drejtuar kurbinasit në vitin në të cilin ata pretendojnë për titullin kampion.
Duro doli si alternativë kryesore që në ditët e para. Por bisedimet ishin ndaluar për shkak të kërkesave ekonomike të trajnerit, i cili ka gjithashtu një staf bashkëpunëtorësh me të cilin punon vazhdimisht.
Laçi vijoi bisedimet edhe me trajnerë të tjerë, duke diskutuar edhe me emra si Peter Pacult apo Orges Shehi e Bledi Shkëmbi. Por në fund kurbinasit vendosën për Duron, i cili ka një eksperiencë të gjerë në Shqipëri dhe jashtë saj, një element që cilësohet i rëndësishëm për pretendimet e Laçit.
