Pasi fituan Kupën e Shqipërisë për meshkuj e femra, ekipet e Partizanit janë shumë afër ta bëjnë këtë edhe në kampionat. Meshkuj e kuq fituan mbrëmjen e sotme 3-0 ndaj Erzenit në Durrës, në finalen e dytë të play off-it në volejboll.
Të besuarit e trajnerit Ylli Tomorri tashmë janë një fitore larg titullit (udhëheqin 2-0 me ndeshje), sukses që mund të vijë në finalen e tretë play off, që luhet pas dy ditësh në kryeqytet.
Një ndeshje në përgjithësi e ekuilibruar, me një epërsi të lehtë të ekipit të Partizanit, që i fitoi setet me shifrat 25-20, 25-21, 25-20. Erzeni rivalizonte deri diku, por më pas nuk ishte në gjendje të mbante ritmin e diktuar nga kryeqytetasit, që shkëputeshin e fitonin pa shumë mund.
Te femrat, Partizani mposhti 3-0 Tiranën në finalen e dytë play off në volejboll për femra, duke udhëhequr 2-0 me ndeshje. Edhe këtu Partizani është vetëm një fitore larg titullit kampion, titull që mund të vijë pas 24 orësh, në përballjen e tretë mes këtyre dy ekipeve. Siç dihet, kampione shpallet skuadra që fiton 3 nga 5 finalet e planifikuara.
