Bashkimi Evropian ka rënë dakord për një armëpushim të pjesshëm me Shtetet e Bashkuara në një mosmarrëveshje mbi tarifat e metaleve të vendosura nga ish Presidenti Donald Trump dhe për të filluar diskutime mbi kapacitetin e tepërt global dhe politikat “shtrembëruese të tregtisë” të Kinës.
Komisioni Europian, i cili mbikëqyr politikën tregtare të BE, tha se do të pezullojë një rritje të planifikuar të tarifave hakmarrëse deri në gjashtë muaj. Këto do të kishin shtuar tarifa për produktet amerikane nga buzëkuqët tek këpucët sportive dhe do të kishin dyfishuar në 50% detyrimet në uiski burbon, motorë dhe anije me motor deri në 1 qershor.
Në një deklaratë të përbashkët, Brukseli dhe Uashingtoni thanë se, si aleatë dhe ekonomi të bazuara në treg, ata mund të promovojnë standarde të larta, të adresojnë shqetësimet e përbashkëta “dhe të kërkojnë llogari nga vendet si Kina që mbështesin politikat shtrembëruese të tregtisë”.
Diskutimet do të kërkonin zgjidhje përpara fundit të vitit për çështjen e kapacitetit global të çelikut dhe aluminit, megjithëse një zyrtar i Komisionit tha se një zgjidhje e mosmarrëveshjes tarifore do të vinte shumë më shpejt.
Një muaj përpara një vizite në Bruksel nga Presidenti i SHBA Joe Biden, një diplomat i BE tha se do të kishte qenë “optikë e tmerrshme” nëse blloku do të kishte rritur tarifat për motoçikletat Harley Davidson dhe produktet e firmave të tjera amerikane.
Bernd Lange, kreu i komitetit tregtar të Parlamentit Evropian, tha se Shtetet e Bashkuara kishin nevojë të vinin në një samit BE-SHBA me një “angazhim të prekshëm për të bërë reciproke gjestin e BE-së. Përndryshe, rritjet e tarifave do të justifikohen.
Shtetet e Bashkuara do të mbajnë tarifat e tyre prej 25% për çelikun dhe 10% për aluminin, të cilat zbatohen gjithashtu për importet nga Kina, India, Norvegjia, Rusia, Zvicra dhe Turqia.
Administrata Trump përmendi arsyet e sigurisë kombëtare të SHBA si bazë për tarifat e saj të metaleve, masa nga të cilat prodhuesit e çelikut si Thyssenkrupp dhe Voestalpine kanë thënë se ishin prekur.
BE mohoi që eksportet e saj të paraqesin ndonjë kërcënim sigurie dhe u përgjigj duke vendosur tarifat e veta në 2.8 miliardë euro të produkteve amerikane, duke përfshirë motorët, uiski dhe lëng portokalli. Këto gjithashtu do të qëndrojnë në vend.
Sidoqoftë, pezullimi i tarifave të mëtejshme u përshëndet si një hap në drejtimin e duhur nga European Aluminium, Distilled Spirits Council i SHBA dhe Harley Davidson, aksionet e të cilëve u rritën më shumë se 6% në një kohë prej tre vjetësh.
Instituti Amerikan i Hekurit dhe Çelikut tha se shpresonte që diskutimet SHBA-BE mund të funksiononin drejt zgjidhjeve thelbësore, duke ruajtur masat tregtare. Ai gjithashtu tha se Kina nuk ishte shkaku i vetëm i kapacitetit të tepërt dhe se rritjet e importit kishin ardhur nga çdo rajon.
BE u kishte kërkuar Shteteve të Bashkuara të pezullonin tarifat e metaleve për gjashtë muaj, duke pasqyruar pezullimin katër-mujor që të dy palët ranë dakord në mars në mosmarrëveshjen e tyre të subvencionit të avionëve.
Komisioni ka thënë se tarifat e SHBA-së ndikojnë në 6.4 miliardë euro të eksporteve të metaleve të BE-së dhe se ajo do të “ribalancojë” 3.6 miliardë eurot e mbetura pas tre vjetësh, ose pas një vendimi të favorshëm nga Organizata Botërore e Tregtisë.
/Përkthyer dhe përshtatur për Konica.al nga Financial Times
VAZHDO TË LEXOSH MË TEPËR PËR TEMËN
“Një goditje e Bitcoin mund të vijë së shpejti”
10 ekonomitë më të mëdha në botë për vitin 2018
