Kreu i Shtetit Ilir Meta, i shoqëruar nga kryetarja e Kuvendit Lindita Nikolla dhe kryeministri Edi Rama kanë zhvilluar homazhe në përkujtim të ditës së Çlirimit.
Ata kanë vendosur kurora me lule në memorialin Nënë Shqipëri te varrezat e Dëshmorëve në nder të të rënëve për çlirimin e vendit nga pushtuesit nazi-fashist.
Ajo që u vë re gjatë ceremonisë ishte shmangia që kreu i shtetit, Ilir Meta dhe kryeministri Edi Rama i bën njëri-tjetrin. Në ceremoni nuk pati qoftë dhe një shtrëngim duarsh mes tyre, por vetëm vendosje të kurorave me lule në memorialin “Nënë Shqipëri”.
Një situatë e ngjashme me atë që u pa dhe ditën e djeshme në festën e Pavarësisë në Vlorë, ku edhe pse ishin të pranishëm së bashku në ceremoni, Rama dhe Meta vendosën sërish ta shmangnin njëri-tjetrin.
Pas përfundimit të homazheve ditën e sotme ishte kreu i shtetit ai i cili u largua i pari, ndërkohë që më pas u larguan dhe Rama dhe Nikolla.
