Një zbulim që kategorizohet sipas të ashtuquajturës “Kulturës Ilire të tumave të Matit”, – një enë qeramike, – u identifikua në fshatin Kthellë, në Mirditë.
Lajmi u bë i ditur nga ministrja e Kulturës, duke theksuar se: “specialistët e Institutit Kombëtar të Trashëgimisë Kulturore realizuan hulumtimin në terren të gjetjeve arkeologjike rastësore, pas njoftimit të dhënë nga banorët e zonës, pranë fshatit Kthellë në Mirditë – ku edhe u konstatuan në sipërfaqe, fragmente qeramike, bronzi, eshtrash etj”.
“Po, në sipërfaqe u gjet edhe një enë e plotë. Sipas studimeve paraprake, rezulton se objekti i zbuluar është një enë qeramike me dy vegje vertikale, të zhvilluara mbi buzë, që daton nga epoka e hekurit”, – cilëson, ministrja Margariti.
Specialistët pranë Drejtorisë së Shërbimit Arkeologjik pranë IKTK, realizuan gjithë procesin e pastrimit dhe të restaurimit të enës, si edhe regjistrimin si pasuri kulturore në “Regjistrin Kombëtar të Pasurive Kulturore”.
Sipas ministres, specialistët e IKTK po vijojnë punën për studimin e materialit arkeologjik.
Për këdo që dashuron klimën alpine dhe ajrin, të kombinuar me arkitekturën, traditën dhe historinë, Mirdita, është një krahinë që nuk duhet humbur.
Monumentet arkeologjike të Mirditës i përkasin më së shumti periudhës së hershme të Mesjetës në Shqipëri, e njohur gjithashtu si “Periudha e Arbrit”, edhe pse në këtë qytet ka varre dhe objekte të shumta që tregojnë se ky ka qenë një vendbanim ilir, që në epokën e bronzit, rreth 2,000 vjet para erës sonë.
VAZHDO TË LEXOSH MË TEPËR PËR TEMËN
‘’Via Egnatia’’ mrekullia mitike e Shqipërisë
“Aty ku ka qenë fillimi i botës”
“Historia e shqiptarëve” sjell fakte të pathëna
