Rikthimi i jashtëzakonshëm i politikanit të majtë Luiz Inácio Lula da Silva për një mandat të tretë si president i Brazilit nuk është vetëm i mirë për vendin e tij.
Fitorja e tij ndaj ekstremistit aktual të djathtë, Jair Bolsonaro, është gjithashtu e mirë për botën. Që kur Bolsonaro mori detyrën në vitin 2019, zjarret e pyjeve dhe shpyllëzimi u rritën në Amazonë, me qeverinë federale që ‘bëri një sy ndaj prerjeve të paligjshme, minierave, kullotave të bagëtive dhe grabitjes së tokës.
Nëse do të lejohej të vazhdonte, dëmtimi i mushkërive të botës do të ishte i pakthyeshëm – me efekte katastrofike në sistemet globale dhe sigurinë ushqimore.
Lula, siç njihet botërisht, u zotua të ndryshojë politikat e paraardhësit të tij që kanë përkeqësuar urgjencën klimatike. Si rezultat, bota do të marrë frymë më lehtë.
Por Bolsonaro humbi vetëm ngushtë zgjedhjet.
Ai ende ka refuzuar të pranojë humbjen e tij. Bolsonaro, i cili lavdëroi diktaturën dhe torturën, mund të mos pranojë kurrë vullnetin e popullit. Por ata që e kanë mbështetur atë – nga ungjilltarët te aleatët politikë – e kanë kuptuar se loja ka përfunduar.
Ngurrimi i tij për të heshtur mund të jetë sepse ai ka frikë të përfundojë pas hekurave. Imuniteti presidencial, kjo mburojë mbaron në janar.
Bolsonaro u mbiquajt “Trump i tropikëve” – dhe ai kishte politika të ngjashme me të.
Ashtu si ish-presidenti amerikan, Bolsonaro polarizoi vendin e tij të ndarë duke denigruar gratë, homoseksualët dhe pakicat.
Ai armatosi përkrahësit e tij duke e mbushur vendin me armë. Një pandemi që vrau pothuajse 700,000 njerëz ndihmoi në arritjen e shifrave të varfërisë në nivelin më të lartë të regjistruar ndonjëherë.
Por mjaft brazilianë u kthyen te Lula, qëndrimi i fundit në pushtet i të cilit solli rritje ekonomike dhe reduktim të pabarazisë.
I burgosur nën qeverinë e mëparshme të djathtë Temer për korrupsion të dyshuar, Lula u lirua dhe dënimet e tij u shfuqizuan vitin e kaluar, duke e lejuar atë të kandidojë përsëri.
Megjithatë, Brazili është një vend shumë i ndryshëm nga ai që ai kryesoi për herë të fundit.
Kur u largua nga detyra në vitin 2010, vlerësimet e miratimit të Lulës ishin stratosferike. Tani një pakicë e konsiderueshme mendon se presidenti i tyre i dikurshëm dhe i ardhshëm është i korruptuar. Brazili në vitin 2010 ishte ekonomia e 7-të më e madhe në botë – ajo tani ka rënë në vendin e 13-të. Vendi karakterizohet nga rritja e borxheve dhe thellimi i ndarjeve.
Rimëkëmbja modeste ekonomike e Brazilit nuk ka gjasa të zgjasë pasi bota përballet me një recesion të cilit nuk do t’i shpëtojë.
Fitorja e Lulës nuk mund të eklipsojë faktin se ai përballet me një Kongres të dominuar nga politikanët konservatorë egoistë të Centrão (“qendra e madhe”) – të cilët kanë qenë aleatë me Bolsonaro.
Presidenti i ri do të duhet të bëjë marrëveshje për të miratuar legjislacionin. Reformat e mëdha strukturore që kanë nevojë për ndryshime në kushtetutë ndoshta do të jenë jashtë tryezës.
Falë politikave të tij mjedisore dhe mbrojtjes së demokracisë, Lula mund të ketë mbështetjen e fuqive kryesore të botës.
Presidenti Joe Biden ka ofruar të krijojë një fond prej 20 miliardë dollarësh për Amazonën sapo Brazili të fillojë të tregojë rezultate në mbrojtjen e pyjeve të tij tropikale.
Nën Bolsonaro, Brazili humbi rrugën dhe mendjen e tij. Fitorja e Lulës tregon se vendi mund të kthehet në rrugën e duhur.
Burimi: The Guardian
Përktheu dhe përshtati: Konica.al