Fitorja e vështirë e kandidatit të arrestuar nga radhët e minoritetit grek dhe koalicionit “Bashkë Fitojmë” në Bashkinë e Himarës, Fredi Beleri ka gëzuar klasën politike dhe median helene. Kryeministri grek Kiriakos Mitsotakis nuk vonoi të shprehte kënaqësinë që Beleri fitoi me 19 vota diferencë ndaj rivalit socialist, Jorgo Goro, por nxitoi ta përdorte këtë sukses për t’i bërë të qartë sërish shtetit shqiptar që nëse nuk e liron Belerin dhe nuk respekton të drejtat e minoritet grek të Himarës, atëherë Greqia do vendosë veton për procesin e integrimit të vendit tonë në Bashkimin Europian. I drejtpërdrejtë dhe më i ashpër për çështjen e arrestimit të Belerit për shit-blerje votash u shfaq Ministri i Shtetit të Greqisë, Akis Sterkskos. Ai kërcënoi Shqipërinë se nëse nuk liron shpejt fituesin e zgjedhjeve në Himarë, marrëdhëniet mes dy shteteve do përkeqësohen. Nga ana tjetër, opinionistët Kreshnik Spahiu dhe Spartak Ngjela nuk vonuan ta refuzonin fitoren e Belerit në Himarë me 19 vota diferencë. Në rrjetet sociale, ata shprehën besimin se nëse drejtësia shqiptare, konkretikisht Gjykata e Posaçme kundër Korrupsionit dhe Krimit të organizuar e shpall fajtor Belerin për 8 vota të vlera me vlerë 40 mijë lekë, siç pretendon policia, atëherë ai nuk e fiton mandatin e kryebashkiakut të Himarës dhe për rrjedhojë zgjedhjet duhet të përsëriten në këtë qytet. Beleri ndodhet në burg prej ditës së premte, teksa u kap me shoqëruesin e tij, avokatin dhe një anëtar të shtabit të tij elektoral me 40 mijë lekë. Arrestimi i tij erdhi me “urdhër” publik të kryeministrit Edi Rama, i cili tha se do të merrej personalisht me Belerin, pasi e akuzoi se po kërcënonte emigrantët himariotë në Greqi të mos votonin për rivalin e tij, Jorgo Goro. Pas, arrestimit Rama zbuti tonet dhe nuk i ka kthyer asnjë përgjigje kërcënimeve të hapura të homologut grek Mitsotakis.
Mitsotakis i gëzuar për fitoren e Belerit: Shqipëria të respektojë minoritetin tonë
Në rrjetet sociale, kryeministri grek iu gëzua fitores së pabesueshme të Belerit. Ai përsëriti deklaratat e ditës së premte ndaj Ramës dhe autoriteteve shqiptare se duhet ta lirojnë fituesin aktual të zgjedhjeve në Himarë për kryetar bashkie dhe se shteti ynë duhet të respektojë të drejtat e minoritet grek, një çështje që prej dekadash nuk është pranuar nga opinioni publik shqiptar. “Isha veçanërisht i lumtur kur u informova se në Himarë, Fredi Beleri ia doli dhe u zgjodh kryetar komune me një diferencë të vogël. Dhe uroj dhe shpresoj që kjo aventurë të marrë fund së shpejti. Rruga e Shqipërisë drejt Europës kalon përmes respektimit të të drejtave të pakicës kombëtare greke”, u shpreh Mitsotakis.
Sterkskos: Do bllokojmë anëtarësimin e Shqipërisë në BE nëse nuk lirohet Beleri
Më i ashpër ndaj shtetit shqiptar u shfaq Akis Sterkskos, Ministri i Shtetit në Greqi. Ai premtoi se në rast se Fredi Beleri nuk lirohet, atëherë shteti helen do të ndërmarrë çdo veprim për të penguar procesin e anëtarësimit të vendit tonë në Bahskimin Europian. Ai i thelloi qëndrimet e tij duke shtuar se kjo gjë nëse nuk zgjidhet mund të përkeqësojë marrëdhëniet Tiranë-Athinë. “Nëse situata nuk qetësohet, siç theksoi zoti Mitsotakis, Greqia do të përdorë çdo mjet që ka në dispozicion për të bllokuar rrugën evropiane të Shqipërisë. Do të ketë pasoja jo vetëm në marrëdhëniet greko-shqiptare, por edhe në ecurinë e pranimit të Tiranës në Bashkimin Evropian, të cilën Greqia e ka mbështetur deri tani. Lajmet që vijnë nga Shqipëria se zoti Beleri ka fituar përfundimisht, shtojnë presionin ndaj Tiranës për të ndryshuar qëndrim”, deklaroi për një media greke ministri Sterkskos
Ngjela i bindur: Beleri dënohet dhe humbet mandatin, është kapur në flagrancë
Krejtësisht ndryshe beson avokati dhe opinionisti Spartak Ngjela se Beleri nuk do ta ushtrojë dot mandatin e kryebashkiakut. Në një status në rrjetet sociale, ai analizoi se rasti i arrestimit të kandidatit fitues të koalicionit “Bashkë Fitojmë” në Himarë nuk mund të përfundojë me lirim të personit në fjalë, pasi është kapur në kushtet e flagrancës dhe për më tepër është një proces që SPAK dhe GJKKO duhet ta përfundojnë në kohë të shpejtë, pasi do të zgjidhte krizën në Himarë për ta shpëtuar nga kalimi në duart e minoritetit grek. “Asgjë, ende nuk është fituar Bashkia e Himarrës. Ai që u zgjodh me sforcim të madh parash, është i arrestuar në bazë të nenit 328 të Kodit Penal për Korrupsion Aktiv në Zgjedhje. Çështja do të gjykohet në SPAK. Nëse gjykata do ta dënojë Belerin me burg, dhe vendimi gjyqësor do të marrë formën e prerë, Beleri shkarkohet automatikisht në bazë të vendimit me burg që i ka dhënë SPAK. Kot gëzohen të shiturit në Himarë. Por, nëse Beleri merr pafajësinë në SPAK, atëherë do vijojë mandatin si Kryetar Bashkie i Himarës. Por kjo është pamundësi absolute, sepse Beleri është kapur në flagrancë, dhe nuk ka gjykatë që t’i japë pafajësi, e jo më SPAK-u. SPAK duhet ta gjykojë sa më shpejt me një procedurë të përshpejtuar, se kjo është një çështje me rëndësi të madhe kombëtare”, shkruan Ngjela.
Kreshnik Spahiu: Nëse Beleri dënohet, zgjedhjet përsëriten në Himarë
Opinionisti dhe juristi, Kreshnik Spahiu u tregua më konciz për rastin e Fredi Belerit. Ai komentoi shkurt në rrjetet sociale se nëse Beleri shpallet fajtor nga GJKKO, ai e humbet mandatin dhe zgjedhjet në Himarë përsëriten, gjë që shtyn koalicionin “Bashkë Fitojmë” të gjejë një kandidat tjetër. “Ligjërisht nëse gjykata deklaron fajtor Fredi Belerin, përsëritet zgjedhje në Himarë”, shprehu mendimin e tij Spahiu.
VAZHDO TË LEXOSH MË TEPËR PËR TEMËN
Arrestimi i Belerit, Mitsotakis reagon ashpër ndaj Ramës
Të vjetër brenda dhe të papërfillshëm jashtë
