Ujëvara e Sotirës në Gramsh, është një prej atraksioneve natyrore më të vizituara gjatë këtij sezoni veror.
Ministrja e Turizmit dhe Mjedisit, Mirela Kumbaro ndau sot në rrjetet sociale pamje nga kjo ujëvarë e pozicionuar në shpatin lindor të malit të Tomorrit.
Ujëvara e Sotirës konsiderohet si një nga ujëvarat më të bukura të vendit tonë. Veçantia e saj qëndron në faktin se përbëhet nga tre burime që depërtojnë malin nga lartësi të ndryshme (20-100 m), duke krijuar pamje mbresëlënëse. Uji që bie prej saj më pas formon lumin me të njëjtin emër.
Kjo zonë ofron edhe mundësi për zhvillimin e aktiviteteve si kamping apo piknik në pjesën e lëndinës mbi ujëvarë.
Ujëvara e Sotirës gjendet jo më shumë se 20 km larg qytetit të Gramshit.
Për shumë kohë, ky destinacion turistik, nuk ishte në itinerarin e turistëve vendas apo të huaj.
Ndërkohë që, vitet e fundit, interesi ka ardhur gjithnjë në rritje edhe nga përtej kufirit. Zakonisht fundjavave, agjencitë turistike organizojnë ekskursione drejt Ujëvarës së Sotirës.
VAZHDO TË LEXOSH MË TEPËR PËR TEMËN
“Air Albania”, fluturimet nisin këtë fundjavë
“Lonely planet”/ Tirana, tërheqëse për tu eksploruar
