Kushtet e vështira të punës mund të çojnë Njësinë Speciale Intervenuese të largohet nga Policia e Kosovës.
Drejtori i njësive elitë, Mentor Shabani nuk ka komentuar mbi çështjen, megjithatë kjo u kthye në temë në Kuvendin e Republikës së Kosovës.
Deputetët opozitarë që mbajtën seancën për shqyrtimin e rezolutës për mbështetjen financiare për policët, bënë përgjegjës Qeverinë e Kosovës.
“Kur po flasim si deputetë, Njësia Speciale Intervenuese e njohur si FIT po shqyrton mundësinë e largimit nga Policia e Kosovës për shkak të pakënaqësive me Qeverinë në raport me kërkesat që ata i kanë pasur e nuk janë plotësuar. Pjesëtarë të kësaj njësie morën pjesë në zmbrapsjen e paramilitarëve serbë në Banjskë“, tha deputetja e PDK-së Blerta Deliu Kodra.
“Ne sot kërkojmë me një rezolutë që policia e Kosovës të mbështetet për rrezikshmëri, orët jashtë orarit të punës, për mungesën ose zvogëlimin e pagës, për veturat e pajisjet që janë në gjendje të tmerrshme.
Rezoluta nuk u hodh as në votim për shkak të mungesës së deputetëve të pushtetit, kështu iniciuesi kërkoi që të plotësohet kjo rezolutë e të sillet prapë në Kuvend“, u shpreh deputeti i LDK-së Armend Zemaj.
“Ta plotësojmë, të shtojmë diçka sepse kërkesat e policisë janë shumë më shumë e ta obligojmë qeverinë të ndërmarrë hapa. Pjesëtarëve të Policisë së Kosovës që shërbejnë sidomos në veri të Kosovës tash e tetë muaj nuk iu paguhen shtesat e rrezikshmërisë“, u shpreh Rashit Qalaj.
Rezoluta e opozitës që u shqyrtua pa pjesëmarrjen e mazhorancës dhe kabinetit qeveritar kërkon që 15 ditë pas miratimit të saj të ndahen mjetet për të mbuluar në mënyrë retroaktive shtesat e rrezikshmërisë, pagesën e sigurimit shëndetësor, hartimin e projektligjit për pension të parakohshëm dhe këto t’i bëjë me procedura të përshpejtuara.
VAZHDO TË LEXOSH MË TEPËR PËR TEMËN
“Do të garantojmë zgjedhje të lira dhe demokratike”
“Do ta informoj publikun për gjithça që po ndodh në Kosovë”
