Ish-kryeministri Sali Berisha, në një prononcim për gazetarët nga Kuvendi, deklaroi se opozita nuk do njohë asnjë ligj që miratohet në kundërshtim të Kushtetutës dhe ligjit.
I pyetur nga gazetarët në lidhje me grevën e urisë së paralajmëruar nga vetë Berisha dhe deputetët e tjerë, ish-kryeministri u shpreh se “deputetet janë të gatshëm që nesër”, të ndërmarrin aksionin e tyre.
Sali Berisha: Gjer në rivendosjen e plotë të të drejtave kushtetuese të përfaqësuesve të popullit opozitar në parlament. Edi Rama bën luftë tani me Kushtetutën, bën luftë me popullin opozitar. Shkelmon mbi të drejtat e popullit opozitar. I tmerruar nga abuzimet me pushtetin e tij, e din se Komisionet Hetimore Parlamentare do ti nxjerrin atij të gjitha të palarat, vendimet antiligjore, antikushtetuese, të gjitha aktet e tij dhe si përfundim do të dorëzojë mandatin dhe të shkojë në punë të vet. Aksionin e keni shumë transparent. Sot e patë, atë komision që ishte nuk ju lanë të futeshit. Parlamenti qëndron vetëm si ndërtesë dhe Grupi i opozitës që mbron Kushtetutën, të tjerët zhduken si minjtë.
Pyetje: A i keni numrat e deputetëve për grevë urie?
Berisha: Që nesër janë të gatshëm. Gatishmëria e qytetarëve është për t’u admiruar.
Pyetje: A do të lejoni miratimin e Buxhetit për 2024?
Berisha: Asnjë ligj që kalon në kundërshtim më Kushtetutën nuk do njihet nga opozita. Ju i pat i kaluan në 15 minuta ligjet të shqyrtuara në kundërshtim me ligjin, të futura pas karrigeve me Online.
