Është i treti vit radhazi, që arbëreshët kthehen në vendin e të parëve, në Krujë.
Shtegtimi i tyre nis nga Durrësi në Lezhë, Krujë e më pas Berat. Rreth 60 përfaqësues të komuniteteve arbëreshe kujtojnë triumfet e Gjergj Kastriot Skënderbeut dhe betejën e fundit të tij, më 24 prill 1467 në Krujë.
Kruja, si kryeqendra e heroit tonë kombëtar e kryetrimit, siç e quajnë vetë ata Skënderbeun, është edhe momenti më kulmor i aktivitetit. Para bustit të Skënderbeu, ata sollën traditën arbërore dhe kulturën e trashëguar prej 550 vitesh.
Pasardhësi i familjes së Kastriotëve, Loris Castriota Scanderbegh, shprehet tejet i emocionuar teksa thekson se, “Kruja është shtëpia e madhe e shqiptarëve, qendra shpirtërore e arbërve, vend ku emocionet të përulin para monumentit të Skënderbeut”.
Në kalldrëmet që shtruan paraardhësit e tyre, ecin të heshtur me kokën në lart, duke parë muret e gurta, ku etërit e tyre e mbrojtën për 25 vite dhe duke i dhënë Shqipërisë, një nga historitë më heroike në Europë.
Në hyrje të Muzeut Kombëtar i pret drejtori Mehfi Hafizi, i cili falënderon për vizitën në Krujë, si shembullin më kuptimplotë të ruajtjes së traditës arbërore. Ndërkohë, përfaqësues të bashkisë Krujë i japin simbolin e qytetit dy përfaqësuesve të komunave arbëreshe, Rosa Carbone, Presidente e “Pro Logo di Lungro” dhe Giuseppe Lacovelli, këshilltar i komunës Casalvecchio.
Gjatë ceremonisë, përfaqësues të bashkisë theksuan se “kurdo e sa herë, jeni të mirëpritur në qytetin tuaj, Krujën dhe shumë krenarë për faktin e dëshmisë më të pastër evropiane për Shqipërinë, janë arbëreshët”.
Pas Krujës, arbëreshët vizituan Beratin, duke e mbyllur aktivitetin historiko-kulturor më 29 prill.
VAZHDO TË LEXOSH MË TEPËR PËR TEMËN
‘’Shpirti arbëresh në veshje’’ në Muzeun Kombëtar
‘Hora degli Albanesi’, jeta e pasardhësve të Skënderbeut në Palermo
