Numri i personave të paraqitur në Urgjencën e Spitalit të Bulqizës me simptoma helmimi është rritur edhe më shumë brenda 24 orëve.
Sipas informacioneve, numri i personave të prekur, është dyfishuar gjatë natës.
Mjeku roje i spitalit të Bulqizës, Shahin Kaja se në total numri i personave të shtruar për helmim ka shkuar në 78.
Fluksi i pacientëve me shenja helmimi vjen nga lagjja e vjetër e qytetit të Bulqizës.
Mjekët thonë se intoksikimi dyshohet të jetë shkaktuar nga uji i pijshëm.
“Shenja intoksikimi janë, sepse shprehen me të vjella, me heqje barku. Shkaqet pastaj nuk dihen, por më shumë dyshime ngrihen për linjën e ujit të pijshëm. Vet kontingjenti në qytet bën që mundësia të jetë më tepër prej ujit, sepse nuk bëhet fjalë as për dasma, as për takime të tjera”, u shpreh Kaja.
Ndërkohë, përfaqësuesit e Drejtorisë së Ujësjellësit në Bulqizë një ditë më parë thanë se nuk janë njoftuar për ndonjë defekt në tubacionet që kalojnë në galeritë e minierave të zonës D.
