Ditën e enjte Serbia ka mbajtur paradë ushtarake në Nish , me të cilën ka shënuar Ditën e Fitores ndaj Gjermanisë naziste në Luftën e Dytë Botërore.
Sipas Agjencisë amerikane e lajmeve, AP, se kjo bëhet fjalë për demonstrim të forcës në rrethana të acarimit të raporteve me Kosovën.
Lidhur me këtë, ka pasur reagime të ndryshme, nga ana e krerëve vendor dhe ndërkombëtarë.
Kyle Scott, i cili është Ambasador amerikan në Beograd, përmes një postimi në Twitter, e ka cilësuar turp për Serbinë pasi gjenerali serb i dënuar për krime lufte, Vlladimir Llazareviç, në Ditën e Evropës në Nish e udhëhoqi paradën ushtarake.
“Është turp që një kriminel lufte i dënuar, të marshojë para atyre të cilët po përpiqen t’i nderojnë aleatët të cilët kanë vdekur duke luftuar për drejtësi dhe paqe në Evropë. Dita e Evropës, Vlerat e Evropës”, ka shkruar Scott.
Edhe Ministri i Punëve të Jashtme të Kosovës, Behgjet Pacolli ka reaguar pas mbajtjes së paradës ushtarake në Serbi. Pacolli është shprehur se Serbia duhet të sillet si një vend i civilizuar dhe të përqendrohet në bashkëpunimin rajonal.
Më tej, Pacolli ka theksuar se Serbia me parada ushtarake vetëm po i dërgon botës një mesazh që ata mbesin një kërcënim për stabilitetin rajonal dhe se mentaliteti i Milloshevçit është ende i gjallë në Beograd.
Ndërkohë, Zëvendëskryeministri i Kosovës, Enver Hoxhaj është shprehur se Presidenti i Serbisë, Aleksandar Vuçiç është duke luajtur lojë të rrezikshme.
Ai ka theksuar se Vuçiç ka mbledhur të dënuarit për krime lufte, në Nish afër kufirit me Kosovën duke mbajtur paratë me armë të Rusisë.
“Ai mblodhi të dënuarit për krime lufte në Nish, afër kufirit tonë, në paradën ushtarake me armë të Rusisë”, ka shkruar Hoxhaj në Twitter. Hoxhaj konsideron se ky nuk është kërcënim vetëm për Kosovën për edhe për fqinjët.
Edhe zëvendësministri i Mbrojtjes në Kosovë, Burim Ramadani ka thënë se turpi i paradës ushtarake e cili është mbajtur në Nish të Serbisë nuk mund të mbulohet.
Në reagimin e bërë në Facebook, Ramadani ka thënë se Serbia është e njëjta sikur në vitet e 90-ta. Dhe që kjo siç ka thënë ai, nuk është e ardhmja e rajonit Ballkanit, raportojnë mediat kosovare.
Duhet kujtuar se Llazareviç, cili ishte ish-komandant i korpusit të Prishtinë dhe i Armatës së Tretë gjatë luftës në Kosovë, është dënuar nga Tribunali i Hagës për krime kundër njerëzimit në Kosovë me 14 vjet burg. Ai u lirua në dhjetor 2015 me kusht, pasi i kaloi më shumë se 10 vjet në burgun e Sheveningenit.
Në paradën ushtarake të mbajtur në Serbi kanë marrë pjesë 4 000 trupa të armatosur, 300 automjete, 40 aeroplanë si dhe dy helikopterë luftarakë me një ekuipazh rus.
VAZHDO TË LEXOSH MË TEPËR PËR TEMËN
“Serbia po provokon luftë, rrezik për Ballkanin dhe botën”
