Në Maqedoninë e Veriut pritet që të ndryshohen më shumë se një e treta e ministrave të kabinetit qeveritar.
Ky paralajmërim është bërë nga kryeministri Zoran Zaev dhe nënkupton nevojën e votimit të gjithë qeverisë në Kuvend.
Njoftimi për ndryshimin e ministrave të kabinetit qeveritar erdhi pas mbledhjes së Këshillit Qendror të partisë së tij Social-Demokrate.
Në këtë mbledhje u shkarkuan nga detyra gjashtë nënkryetarët e partisë dhe organet e tjera partiake.
“Do të ketë ndryshime në postet ministrore. Do të ndërrohen më shumë se një e treta e ministrave, që nënkupton qeveri të re.
Do të ketë ndryshime edhe në pozicionet tjera në qeveri. Çdokund ku është regjistruar arrogancë dhe mungesë të rezultateve do të ketë ndryshime”, ka deklaruar Zaev pas mbledhjes së organeve partiake që ka zgjatur deri rreth mesnatës.
Ndryshimet në qeveri dhe parti, Zaev i ka paralajmëruar për shkak të rezultatit jo të mirë në zgjedhjeve presidenciale, në veçanti në rrethin e parë më 21 prill kur partia e tij, LSDM në koalicion me 31 parti tjera arriti fitore me një dallim prej vetëm rreth pesë mijë votave kundrejt VMRO-DPMNE-së, opozitare e cila në zgjedhje mori pjesë e vetme.
Kryeministri maqedonas, Zoran Zaev ndryshime pret edhe tek resorët që drejtohen nga Bashkimi Demokratik për Integrim.
Siç bëhet e ditur Zaev i ka dorëzuar kreut të Bashkimit Demokratik për Integrim, Ali Ahmeti një listë me emrat e zyrtarëve të kësaj partie që duhet ndërruar për shkak të rezultateve të dobëta.
Ndryshimet në qeveri pritet të ndodhin në fillim të muajit qershor.
VAZHDO TË LEXOSH MË TEPËR PËR TEMËN
100 vite nga Lufta e I Botërore në Shqipëri
‘Si kalova përmes Shqipërisë e shkova në…’
