Lidhur me kërkesën e tij, për anulimin e çmimit “Nobel” akorduar shkrimtarit austriak proserb, Peter Handke Akademia Suedeze i ka kthyer përgjigje kreut të Akademisë së Shkencave dhe Arteve të Kosovës, Mehmet Krajës.
“Të zhgënjyer thellësisht me ndarjen e sivjetshme të Çmimit Nobel, Akademia e Shkencave dhe Arteve e Kosovës kërkon të anulohet ky vendim i Akademisë Suedeze, si akt mirëkuptimi e solidariteti me të gjithë popujt e botës që luftojnë për liri dhe vlera demokratike”, kishte shkruar Kraja në letrën e tij dërguar akademisë suedeze më 10 tetor 2019, ku kishte numëruar radhazi gjithë ato që Handke kishte thënë për regjimin e Millosheviçit.
Ndërkohë në letrën që Akademia Suedeze i ka kthyer Krajës thuhet se, Nobeli për letërsinë iu akordua shkrimtarit Handkes, për veprën që ka krijuar, jo për atë si njeri personalisht.
Po ashtu, mes të tjerash thuhet se ndarja e një çmimi të tillë është bërë në përputhje të plotë me testamentin që e kishte lënë Alfred Nobel.
Më poshtë, gjeni letrën e plotë të Akademisë Suedeze dërguar kreut të ASHAK-ut, Mehmet Krajës:
I nderuar Z. Kraja,
Ju faleminderit për shqetësimin tuaj të sinqertë. Komiteti i Nobelit i ka vlerësuar qëllimet që qëndrojnë pas veprës letrare të zotërisë Handke, në mënyrë tjetër nga ju dhe Komiteti ka arritur në përfundimin se, vendimi për dhënien e çmimit për të është në pajtim të plotë me qëllimin e shprehur në testamentin e Alfred Nobelit. Është e qartë, se Handke kuptohet në mënyra të ndryshme. Çmimi “Nobel” ndahet për arritje. Kur Handke shpërblehet me çmim, synimi është të vlerësohet vepra e tij e jashtëzakonshme letrare dhe jo personi. Çmimi “Nobel” për fizikë ose kimi ndahet për zbulim, pavarësisht nga personi; çmimi në letërsi ndahet për zbulimin dhe zhvillimin e një mënyre të re të të shkruarit, pavarësisht nga personi. Vetëm vlerësimi estetik dhe asgjë tjetër përpos këtij vlerësimi është mesazhi që nënkupton ndarja e këtij çmimi.
Komiteti beson se në një shoqëri të hapur duhet të ketë vend për mendime të ndryshme për autorët dhe se, duhet të ketë vend për interpretime të ndryshme dhe të arsyeshme të veprave të tyre letrare. Ne duhet të përpiqemi të respektojmë secilin, pavarësisht nga pikëpamjet e krejtësisht të ndryshme për çështje të rëndësishme. Në kuptim të kësaj që u tha gjithashtu besojmë se është e rëndësisë më të lartë në funksion të demokracisë dhe një dialogu të arsyeshëm që ne kemi vendosur të mbështetemi në gjetjet e ligjshme të gjykatave të tilla si Tribunal i Hagës. Gjetjet e Tribunalit për ne janë pjesë thelbësore e të kuptuarit të historisë tragjike të Evropës, nga e cila të gjithë shpresojmë se mund të mësojmë.
Ju sigurojmë për respektin dhe konsideratat tona më të larta.
Anders Olsson
Kryesues i Komitetit të Nobeli
VAZHDO TË LEXOSH MË TEPËR PËR TEMËN
“Nobeli? Peter Handke lindi dhe u rrit në kufi me Jugosllavinë!”
Autoritetet austriake: Peter Handke nuk ka kërkuar leje!
