Teatri rus me famë botërore, “Bolshoi”, në Moskë është goditur nga një përhapje masive e koronavirusit, me 34 raste infektimi. Sëmundja shpërtheu pasi trupa bëri një performancë televizive në auditorin e zbrazur, teksa Rusia është e bllokuar në karantinë, me 21,102 të infektuar dhe 170 viktima.
Drejtori i përgjithshëm i Bolshoit, Vladimir Urin, tha se 34 vetë, të përfshirë në organizimin e koncertit televiziv, që u quajt ‘Jemi së bashku’, rezultuan pozitivë me covid-19. Urin shtoi, se i gjithë personeli i teatrit pa përjashtim, ishin testuar dy ditë para koncertit, duke përfshirë rojet dhe teknikët.
“Tridhjetë e katër të infektuarit me koronavirus, nuk kanë shfaqur simptoma, por kanë pezulluar punën dhe janë izoluar”.
Qindra njerëz e kishin kaluar me sukses testin e koroanvirusit, dy ditë para eventit madhor, që u organizua në shenjë falënderimi për doktorët rusë, punonjësit e emergjencës dhe vullnetarët në përpjekjet kundër koronavirusit.
Kërcimtari Sergei Polunin, tha: “Isha shumë i lumtur që u riktheva në skenë dhe kërceva në mbështetje të njerëzve që po luftojnë kundër virusit, megjithëse ishte e çuditshme, përpara një salle bosh. Por, teksa ecja në skenë, e ndjeja se publiku ishte aty”.
Sipas disa medieve vendase, përhapja e infeksionit në “Bolshoi”, tregonte dështimin e shëndetësisë, teksa sot, në Rusi u raportuan 2,774 raste të reja.
Presidenti Vladimir Putin, ka pranuar vështirësitë në frenimin e epidemisë, duke thënë se duhet ruajtur vigjilenca: “Kemi disa probleme dhe javët në vijim, do të jenë vendimtare për vendin, ndaj duhet shumë vigjilencë”.
VAZHDO TË LEXOSH MË TEPËR PËR TEMËN
Zakharova vesh Coco Chanel në skenë
“Valltari i padukshëm francez”
Fondi i artë i baletit botëror
