Jemi në kryeqytetin e Egjiptit, në vitin e largët 1947. Darka e Vitit të Ri në Pallatin Mbretëror të Kajros, bëri bashkë dy antagonistë të së njëjtës faqje të historisë.
Victor Emmanuel III i Italisë dhe Zogu i Shqipërisë, përfunduan të ulur pranë njëri-tjetrit.
Mes tyre, gjendej mbretëresha me origjinë shqiptare e Iranit, Fawzia Fuad.
Rastësia historike është se, mbreti Zog dhe familja e tij, do të largoheshin nga Shqipëria më 12 prill të vitit 1939.
Mbreti Zog
Katër muaj përpara se Gjermania të pushtonte Poloninë më 1 shtator, parlamenti shqiptar votoi për bashkimin me Italinë.
Vendosja e një qeverie fashiste parashtronte rrëzimin e mbretit Zog në favor të mbretit italian, Viktor Emanuel III.
Pas largimit nga Shqipëria për shkak të agresionit ushtarak fashist, mbreti Zog me familjen dhe oborrtarët që e shoqëronin u vendosën në disa shtete.
Në vitin 1947, ata shkuan dhe u vendosën në Kajro.
Kjo, pas ftesës së mbretit Faruk, trashëgimtarit të dinastisë së famshme egjiptiane me origjinë shqiptare që sundoi Egjiptin për dekada të tëra.
Mbreti Zog u prit me nderim të madh nga mbreti Faruk i Egjiptit.
Faruku ishte i vetmi që vazhdonte të njihte qeverinë shqiptare të Mbretit Zog në mërgim.
Duke mbajtur të hapura dhe në veprim legjionet shqiptare në Kajro, mbreti egjiptian i krijoi Zogut të gjitha kushtet e një jetese normale.
Mbreti Faruk e respektonte mbretin Zog, ndryshe nga të gjithë homologët e tij, duke marrë shkas nga origjina e tij e largët.
Victor Emmanuel III
Mbretërimi 46-vjeçar i Victor Emmanuel III, që filloi në vitin 1900 pas vrasjes së të atit Umberto I, përfshiu periudhën e sundimit fashist në Itali.
Emmanuel III u kritika shumë, pasi nuk ia doli mbanë që të ndalonte Benito Musolinin për të marrë pushtetin.
Monarku – i njohur si “Sciaboletta”, për shkak të shtatit të tij – kaloi fronin në vitin 1946, në favor të djalit të tij, Umberto II.
Kjo u pa si një përpjekje e kotë e tij për të shmangur një plebishit të italianëve nëse vendi duhet të mbeste monarki, apo të bëhej republikë.
Pasi italianët votuan në favor të republikës, Victor Emmanuel mërgoi drejt Aleksandrisë në Egjipt, ku edhe ndërroi jetë.
Rikthimi i “të mërguarve”
Eshtrat e mbretit Zog, do të mbërrinin në Shqipëri në nëntor të vitit 2012. Trupi i monarkut shqiptar gjendej prej 50 vjetësh, në varrezat ”Thiais” në jug të Parisit.
Eshtrat e tij u vendosën në një mauzoleum të sapondërtuar për familjen mbretërore.
Ndërsa eshtrat e Victor Emmanuel III, i cili vdiq në mërgim në vitin 1947, u kthyen nga Egjipti në dhjetor të vitit 2017.
Eshtrat e monarkut italian u rivarrosën në mauzoleun familjar, pranë Torinos.
VAZHDO TË LEXOSH MË TEPËR PËR TEMËN
“Me fat, kush blen makinën e një mbretëruci shqiptar…”
“Historia e Shqipërisë do shkruar ‘kur t’ftohen gjakrat”
“Babai im, ndihmoi me para Ismail Qemalin… vdiq në mjerim”
