GENC ÇAUSHI/ Rrugët në Veri të Kosovës që të çojnë në dy vendkalimet kufitare me Serbinë – Jarinjë dhe Bërnjak – u zhbllokuan të hënën nga grupe serbësh, të cilët të dielën u hodhën në protesta kundër vendimeve të qeverisë së Kosovës për masat e reciprocitetit me Serbinë lidhur me dokumentet e identifikimit dhe përdorimin e targave të lëshuara nga autoritetet serbe.
Qeveria e Kosovës vendosi pak para mesnatës së të dielës që të shtyjë për një muaj zbatimin e vendimeve, pas këshillimit me ambasadorin amerikan, Jeff Hovenier, i cili kërkoi një shtyrje 30- ditore. Kjo kërkesë u bë edhe nga zyrtarët e Bashkimit Europian. Qeveria e Kosovës tha se shtyrja e zbatimit të vendimeve hyn në fuqi nga çasti “kur do të hiqen të gjitha barrikadat dhe të vendoset liria e plotë e lëvizjes në të gjitha rrugët në Veri të Kosovës”. Kryeministri i Kosovës, Albin Kurti, tha të hënën në një konferencë me gazetarë se e kupton brengën e diplomatëve europianë dhe amerikanë për efektin negativ të fushatës së dezinformimit mbi vendimet për reciprocitetin dhe, për këtë arsye, është vendosur shtyrja e zbatimit të tij.
“Nuk do të lejojmë destabilizimin e rendit kushtetues demokratik të Republikës sonë, do të përkujdesemi që të mbizotërojë ligji dhe paqja, për siguri e mirëqenie për të gjithë qytetarët pa dallim. U bëjmë thirrje faktorëve ndërkombëtarë, kryeqendrave perëndimore e demokratike, BE-së dhe NATO-s, që të dënojnë dhunën dhe agresionin e bandave kriminale në Veri të Kosovës, të cilat janë qartazi të nxitura, të përgatitura e financuara nga Beogradi”, tha ai. Sipas vendimeve që qeveria është zotuar t’i shtyjë, të gjithë shtetasit e Serbisë që do të hyjnë në Kosovë do të pajisen me një dokument të përkohshëm që do të zëvendësojë dokumentet e identifikimit personal. Sipas vendimit të qeverisë së datës 29 qershor, nga e hëna, më 1 gusht, duhej të rridhte afati dy muajsh për të gjithë qytetarët e Kosovës që kanë makina me targa të lëshuara nga Serbia, t’i regjistrojnë ato me targat e Kosovës RKS.
Në vendkalimet tjera kufitare me Serbinë, që nga mesnata ka filluar lëshimi i dokumenteve të përkohshme. Policia tha se gjendja në Veri të Kosovës është e qetë, pas një nate të trazuar që ngriti shqetësimet për gjendjen e sigurisë në rajon. Forcat paqeruajtëse të drejtuara nga NATO thanë të dielën se po e ndjekin nga afër situatën dhe janë të gatshme të ndërhyjnë nëse rrezikohet qëndrueshmëria. KFOR-i tha se do të ndërmarrë “të gjitha masat e nevojshme për të ruajtur një mjedis të sigurt në Kosovë”. Rreth 3,800 pjesëtarë të KFOR-it kujdesen për sigurinë në Kosovë edhe 23 vjet pas përfundimit të luftës. Bashkimi Europian tha se çështjet e hapura ndërmjet Kosovës dhe Serbisë duhet të trajtohen nëpërmjet bisedimeve të lehtësuara prej tij dhe duke u përqendruar në normalizimin gjithëpërfshirës të marrëdhënieve ndërmjet tyre, që janë thelbësore për rrugën drejt integrimeve europiane.
Kosova shpalli pavarësinë e saj në shkurt të vitit 2008 me mbështetjen e Shteteve të Bashkuara dhe vendeve kryesore të Bashkimit Europian. Por ajo kundërshtohet nga Serbia e mbështetur nga Moska, e cila të dielën akuzoi autoritetet e Kosovës për “veprime diskriminuese”. Serbia është vendi i vetëm në Europë që nuk iu është bashkuar sanksioneve perëndimore kundër Rusisë për shkak të agresionit të saj në Ukrainë.
VAZHDO TË LEXOSH MË TEPËR PËR TEMËN
‘Veriu duhet të shkëmbehet me Luginën e Preshevës’
“Do ishte gabim të hiqej taksa ndaj Serbisë pa e njohur Kosovën”
“Dorëheqja ime testoi Kosovën”, Haradinaj bën bilancin
