Funerali shtetëror i mbretëreshës Elizabetë, do të shfaqet nga rreth 125 kinema në të gjithë Britaninë. Po ashtu, në parqe, sheshe dhe katedrale do të ketë ekrane për të pasqyruar ngjarjen e madhe ceremoniale.
E gjithë ceremonia do të përcillet gjithashtu, drejtpërdrejt, në televizion nga BBC, ITV dhe Sky. Presidentë, kryeministra dhe anëtarë të familjes mbretërore nga e gjithë bota, do të kryejnë nderimet për monarken më jetëgjatë të Britanisë, e cila u nda nga jeta më 8 shtator, në moshën 96-vjeçare.
Hyrja në shfaqjet e kinemasë është falas, ka bërë të ditur Shoqata e Kinemasë në Mbretërinë e Bashkuar. Prej ditësh me radhë, qindra mijëra njerëz janë mbledhur në radhë kilometrike në “Westminster Hall”, për të bërë nderimet për mbretëreshën.
Kjo është ngjarja më e madhe, pas funeralit të princeshës Diana në vitin 1997, Olimpiadën e Londrës më 2012 dhe dasmat mbretërore. Strukturat hoteliere dhe bizneset e shitjes me pakicë, që zakonisht qëndrojnë të hapura për të përfituar nga rritja e kërkesës, do t’i mbyllin dyert, në shenjë respekti për monarken.
Ndërkaq, Aeroporti “Heathrow” i Londrës, do të punojë me kapacitet shumë të vogël, për të reduktuar zhurmën në qendër të Londrës, ndërsa janë anuluar një pjesë e madhe e fluturimeve. Duke filluar nga “Southwark Park”, pamjet me dron tregojnë mijëra njerëz që qëndrojnë në radhë pranë monumenteve kryesore të Londrës, si: teatri “Globe”, “Tower Bridge” dhe Shtëpitë e Parlamentit përgjatë bregut të lumit “Thames”.
Lulet dhe flamujt kanë veshur kryeqytetin anglez që prej 8 shtatorit, ndërsa përreth pallatit mbretëror janë ngritur kopshte dhe parqe.
VAZHDO TË LEXOSH MË TEPËR PËR TEMËN
Kush ishte Elizabeta II
Elizabeta refuzon çmimin ”diskriminues”
Elizabeta ishte edhe tifoze…
