Pas lajmit të ndarjes nga jeta të presidentit Ebrahim Raisi, Irani do të ketë një president të ri.
Mohammad Mokhber, i cili deri tani mbante postin e zëvendës presidentit të parë, do të marrë detyrën, ndërkohë që brenda 50 ditëve vendi duhet të shkojë në zgjedhje të reja presidenciale.
Por kush është Mohammad Mokhber?
I lindur më 1 shtator 1955, Mokhber, ashtu si Raisi, shihet si i afërt me liderin suprem Ali Khamenei, i cili ka fjalën e fundit në të gjitha çështjet e shtetit. Mokhber u bë zv. President i parë në 2021 kur Raisi u zgjodh president.
Mokhber ishte pjesë e një ekipi zyrtarësh iranianë që vizituan Moskën në tetor dhe ranë dakord të furnizonin me raketa tokë-tokë dhe më shumë dronë për ushtrinë ruse. Ekipi përfshinte gjithashtu dy zyrtarë të lartë të Gardës Revolucionare të Iranit dhe një zyrtar nga Këshilli i Lartë i Sigurisë Kombëtare.
Mokhber ishte më parë kreu i Setad, një fond investimi i lidhur me liderin suprem.
Në vitin 2010, Bashkimi Evropian përfshiu Mokhber në një listë të individëve dhe subjekteve që u sanksionuan për përfshirje të supozuar në “aktivitete bërthamore ose raketore balistike”.
Dy vjet më vonë, BE e hoqi atë nga lista.
Në vitin 2013, Departamenti Amerikan i Thesarit shtoi Setad dhe 37 kompani që mbikëqyrte në një listë të subjekteve të sanksionuara.
VAZHDO TË LEXOSH MË TEPËR PËR TEMËN
