Rreth 10 familje në qytetin e Beratit nuk furnizohen me ujë të pijshëm, prej disa ditësh.
Një prej banorëve të pallatit, ka prerë tubat e të gjithë depozitave që ndodheshin në taracën e banesës së tij, pas një konflikti me banorët e tjerë. Banorët e kanë denoncuar situatën në polici por ende nuk kanë marrë zgjidhje.
Bëhet fjalë për taracën e një pallati pesë katësh në lagjen “Dëshmorët e Kombit”, e cila në të gjithë hapësirën e saj është zënë nga një banor që jeton në katin e pestë.
Banori pretendon se i prishet soleta e taracës dhe ka prerë tubat e depozitave të banorëve të kateve të poshtëm, duke i lënë këta të fundit pa ujë të pijshëm. Banorët e tjerë shprehen se depozitat i kanë vendosur me mirëkuptim në hapësirën e soletës që përkon vetëm me shkallët e pallatit dhe si e tillë është e përbashkët dhe nuk prek sipërfaqen e shtëpisë të pronarit të katit të pestë.
Ky i fundit pasi ka prerë tubat e ujit nuk ndodhet në banesë ditët e fundit, kur Policia Bashkiake ka shkuar për ta pyetur lidhur me ngjarjen.
Në këto kushte banorët shprehen se jo vetëm që janë pa ujë të pijshëm prej ditësh, por dhe në një konflikt të hapur me bashkëqytetarin e tyre dhe kërkojnë zgjidhje.
