Presidenti Ilir Meta ka reaguar pas ndarjes nga jeta të senatorit republikan amerikan John McCain. Në mesazhin e tij, kreu i shtetit thotë se ky lajm ishte i hidhur për të gjithë shqiptarët.
Sipas Metës, McCain, ishte mbështetës i Kosovës dhe pavarësisë së saj si dhe anëtarësimit të Shqipërisë në NATO.
Mesazhi i Metës:
Ndarja nga jeta e Senatorit John McCain është një lajm i hidhur për mua dhe për të gjithë shqiptarët.
Sot u largua nga jeta një hero lufte dhe një patriot i madh, njeriu që i shërbeu kombit të tij me vetëmohim, heroizëm e ndershmëri të pashoqe.
Ai i shërbeu lirisë dhe të drejtave të njeriut në botë e veçanërisht në Ballkan.
Senatori McCain ishte një nga mbështetësit e vendosur të çështjes së Kosovës dhe kauzës për lirinë dhe pavarësinë e saj.
Ai u bë një ndër mbështetësit kryesorë të anëtarësimit të Shqipërisë dhe të rajonit tonë në NATO për të cilën të gjithë shqiptarët i janë mirënjohës.
Angazhimi i përkushtuar i njerëzve të tillë si McCain për çështjen e të drejtave dhe të lirive të popujve të shtypur në botë e kanë bërë SHBA-në një vend lider të demokracisë dhe rriti simpatinë e saj në gjithë botën.
Sot shqiptarët humbën një mik të veçantë e të pazëvendësueshëm.
U prehtë në paqe shpirti i tij!
EB
VAZHDO TË LEXOSH MË TEPËR PËR TEMËN
Ndërron jetë senatori republikan McCain
Basha: McCain mbështeti betejat shqiptare
